Özünü sizdən ağıllı hesab edənlərin işlətdiyi cümlələr

Özünü ətrafındakı hər kəsdən daha ağıllı görən insanlar fərqində olmadan işlətdikləri bəzi ifadələrlə özlərini büruzə verə bilirlər. "YourTango" münasibətlərdə incikliyə səbəb ola bilən və üstünlük duyğusunu əks etdirən 13 cümləni sıralayıb.

Milli.Az xəbər verir ki, "YourTango"nun yazdığına görə, özünü ətrafındakı insanlardan daha ağıllı hesab edən şəxslər istifadə etdikləri bəzi ifadələrlə yaxın münasibətlərinə zərər verə bilərlər. Bu insanlar söhbət zamanı qarşı tərəfin fikirlərini kiçiltmək, onları dəyərsiz hiss etdirmək və özlərini üstün mövqeyə qoymaq tendensiyasına malik olurlar. Sözügedən davranışların arxasında yalnız məlumatlı olmaq deyil, qarşı tərəfə üstünlük qurmaq istəyi də dayana bilir. Empatiya qurmaq əvəzinə haqlı çıxmağa köklənən bu şəxslərin işlətdiyi bəzi ifadələr isə diqqət çəkir:

"Bunu sənə daha sadə şəkildə izah edim"
Kömək etmək məqsədi daşıyırmış kimi görünsə də, bu ifadə qarşı tərəfin mövzunu başa düşməkdə çətinlik çəkdiyi və ya kifayət qədər məlumatlı olmadığı mesajını verə bilər. Kinayəli və ya yuxarıdabanlı tonda deyildikdə insanın özünü dəyərsiz hiss etməsinə yol aça bilər.

"Sən başa düşmürsən də"
Qarşı tərəfin düşüncəsini anlamaga çalışmaq əvəzinə birbaşa yetərsiz olduğunu söyləmək ünsiyyəti zədələyən yanaşma kimi önə çıxır. Fərqli bir baxış bucağını müzakirə etmək əvəzinə, insanın anlama qabiliyyətini hədəf alan bu söz özgüvənə də mənfi təsir edə bilər.

"Bunu başa düşməzdiniz"
Bu ifadə qarşı tərəfin müəyyən bir mövzunu qavraya biləcək potensiala sahib olmadığını ehtiva edir. Beləliklə, danışan şəxs özünü məlumatlı, qarşısındakı insanı isə yetərsiz tərəf olaraq mövqeləndirir.

"Tamamilə texniki baxımdan yanaşsaq..."
Texniki məlumat vermək təkbaşına problem deyil. Lakin bu ifadə qarşı tərəfin dediklərini önəmsizləşdirmək üçün istifadə edildikdə aşağılayıcı təsir yarada bilər. Söhbəti məlumat mübadiləsindən çıxarıb üstünlük yarışına çevirə bilər.

"Bunu daha dərindən düşünməliyik"
Bu cümlə qarşı tərəfin düşüncələrinin kifayət qədər əhatəli olmadığını ehtiva etmək üçün istifadə oluna bilər. Özünü daha ətraflı düşünən tərəf hesab edən şəxs bununla qarşı tərəfin baxış bucağını birbaşa kiçiltmiş olur.

"Bunu sənə demək məcburiyyətində qalan şəxs olmaq həqiqətən istəmirəm"
Söyləyəcəyi şeyin qarşı tərəf üçün narahatedici olduğunu vurğulayan bu ifadə eyni zamanda danışan şəxsə üstün mövqe qazandıra bilər. Qarşısındakı insanın davranışını anlamaga çalışmaq əvəzinə onu mühakimə edən bir tavr ortaya çıxa bilər.

"Üzr istəyirəm, amma..."
Bəzi insanlar qırıcı sözlərini bu ifadə ilə yumşaltmağa çalışırlar. Lakin davamında gələn cümlələr çox vaxt qarşı tərəfi incidir. Xüsusilə davranışlarını "dürüstlük" bəhanəsi ilə müdafiə edən şəxslərdə bu qəlib tez-tez istifadə olunur.

"Bu, sadəcə sağlam düşüncə məsələsidir"
Bir mövzunu bilməməyi və ya fərqli düşünməyi birbaşa sağlam düşüncə əskikliyi kimi qiymətləndirmək qarşı tərəfin zəkasını və mühakimə qabiliyyətini sorğulayan bir tavra çevrilə bilər. Buna görə də ifadə sadə bir izahatdan çox aşağılama kimi qəbul oluna bilər.

"Sənə bir neçə məsləhət verim"
Qarşı tərəfin məsləhət istəmədiyi hallarda istifadə edilən bu ifadə ünsiyyəti asanlıqla gərginləşdirə bilər. Danışan şəxsin özünü daha təcrübəli və ya məlumatlı görməsi, məsləhətin qarşı tərəfdə təzyiq hissi yaratmasına səbəb ola bilər.

"Əslində..."
Təkbaşına sıradan bir söz olan "əslində" işlədildiyi tondan asılı olaraq olduqca fərqli məna qazana bilər. Qarşı tərəfin dediklərinin səhv olduğunu vurğulamaq məqsədilə istifadə edildikdə, söhbəti düzəltmə səyindən çox üstünlük qurmaq cəhdi kimi qəbul edilir.

Müəllif: Ülkər Vəliyeva (Milli.Az redaktor)