Siyasət

"Prezident İlham Əliyevin təşəbbüsləri böyük dəstək qazandı və beynəlxalq həmrəyliyin nümunəsi kimi qəbul edildi"

29 İyun 2020 12:11
Baxış: 880

COVID-19 pandemiyası başlayandan bəri Prezident İlham Əliyevin koronavirusa qarşı regional və qlobal səviyyədə mübarizədə beynəlxalq həmrəyliyin gücləndirilməsi məqsədilə irəli sürdüyü təşəbbüslər dövlətimizin başçısının yüksək liderlik keyfiyyətlərinin bariz nümunəsi kimi dəyərləndirilməlidir.

Bunu Milli.Az-a siyasi ekspert Elçin Mirzəbəyli deyib.

O, bildirib ki, böhran vəziyyətlərində çıxış yolu tapmaq, xarakter nümayiş etdirmək, qətiyyətli davranmaq, çevik və rasional qərarlar qəbul etmək, xalqı vahid hədəflər ətrafında birləşdirmək, milli həmrəyliyi təmin etmək hər bir dövlət idarəçisinə xas olmayan yüksək liderlik keyfiyyətləridir:

"Təbii ki, bu keyfiyyətlər özünü ən çətin, bəzən isə çıxılmaz vəziyyətlərdə büruzə verəndə daha qabarıq, daha aydın görünür. Məhz bu baxımdan, COVID-19 pandemiyası başlayandan bəri Prezident İlham Əliyevin koronavirusa qarşı regional və qlobal səviyyədə mübarizədə beynəlxalq həmrəyliyin gücləndirilməsi məqsədilə irəli sürdüyü təşəbbüslər dövlətimizin başçısının yüksək liderlik keyfiyyətlərinin bariz nümunəsi kimi dəyərləndirilməlidir. Bu keyfiyyətlərin özünü təkcə ölkə sərhədləri çərçivəsində deyil, daha qlobal müstəvidə büruzə verməsi isə təbii qəbul olunmalıdır.

Prezident İlham Əliyevin təşəbbüsləri və səyləri nəticəsində Azərbaycanın və onun paytaxtının qlobal humanutar problemlərin müzakirə olunduğu, mədəniyyətlərarası dialoqin təşviq edildiyi bir platformaya çevrilməsi, əslində dünyada baş verən proseslərə qlobal baxış nümunəsini hələ pandemiyadan xeyli öncə yaratmışdı. Bu səbəbdən də, COVID-19-a qarşı mübarizə mövzusunda Türkdilli Dövlətlərin Əməkdaşlıq Şurasının  dövlət və hökumət başçılarının və Qoşulmama Hərəkatının Təmas Qrupunun zirvə görüşləri ilə bağlı Prezident İlham Əliyevin təşəbbüsləri böyük dəstək qazandı və beynəlxalq həmrəyliyin, qlobal məsuliyyətin nümunəsi kimi qəbul edildi.

Prezident İlham Əliyev Qoşulmama Hərəkatının onlayn Zirvə görüşündə çıxışı zamanı qlobal həmrəyliyin nümunəsi kimi pandemiya ilə mübarizə məqsədilə BMT Baş Assambleyasının dövlət və hökumət başçıları səviyyəsində videokonfrans vasitəsilə xüsusi sessiyasının keçirilməsi təklifini irəli sürməsi və təklifin yekdilliklə qəbul olunması ölkəmizə və onun liderinə olan yüksək etimadın nümunəsi kimi mühüm əhəmiyyətə malikdir.

Məlum olduğu kimi, BMT-nin 130-dək üzv dövləti tərəfindən Qoşulmama Hərəkatının sədri statusunda Prezident İlham Əliyevin Baş Assambleyanın xüsusi sessiyasının keçirilməsi barədə təşəbbüsünü dəstəkləyib. Təşəbbüsü dəstəkləyən ölkələr dünyanın bütün regionlarını əhatə edir. Dövlətlər tərəfindən bu məsələ ilə əlaqədar BMT Baş katibinə ünvanlanan məktublarda Prezident İlham Əliyevin Baş Assambleyanın xüsusi sessiyasının keçirilməsi ilə bağlı təşəbbüsünün vaxtında irəli sürülmüş və çox ehtiyac duyulan təşəbbüs olduğu vurğulanır".

Politoloqun fikrincə, bəşəriyyət üçün böyük təhlükə yaradan, insanlığı çətin sınaq qarşısında qoyan COVİD-19 virusunun tüğyan elədiyi bir zaman kəsiyində Azərbaycanın nümayiş etdirdiyi mövqe, irəli sürdüyü təşəbbüslər və atdığı addımlar, şübhəsiz ki, ölkəmizin təkcə beynəlxalq münasibətlər sistemindəki mövqeyini deyil, həm də bəşər tarixindəki yerini də möhkəmləndirəcək.

Bəxtiyar Umarlı
Milli.Az

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.