Siyasət

Elmar Məmmədyarov: "Ünsiyyəti rus dilində qurmaq daha səmərəlidir"

6 Dekabr 2014 14:52

Baxış: 967

#SİYASƏT #GUAM

GUAM çərçivəsində müxtəlif sahə nümayəndələri arasında görüş və danışıqlarda ünsiyyəti ingilis dili ilə müqayisədə rus dilində qurmaq daha səmərəlidir

Trend-in RİA Novosti-yə istinadən verdiyi məlumata görə, bunu Azərbaycanın xarici işlər naziri Elmar Məmmədyarov deyib.

Bazeldə ATƏT XİNŞ-nin iclası çərçivəsində GUAM-ın növbəti görüşündə Ukraynanın xarici işlər naziri GUAM-ın iclaslarını ingilis dilində aparmağı təklif edib. GUAM-ın nizamnaməsinə əsasən, təşkilatın rəsmi dilləri ingilis və rus dilidir.

E.Məmmədyarov qeyd edib ki, GUAM çərçivəsində bir çox sahələrdə əməkdaşlıq mövcuddur: "Fikrimcə, həmin sahə nümayəndələrinin görüşləri və müzakirələrinin rus dilində aparılması daha rahat və səmərəlidir".

Onun sözlərinə görə, siyasi emosiyaların əsiri olmaq lazım deyil: "Dildən ünsiyyət rahatlığı və diplomatiyada isə ətrafdakılara fikir və mövqeni daha dəqiq çatdırmaq üçün istifadə etmək lazımdır".

Milli.Az