ATƏT-in Minsk Qrupundan erməni hərbi helikopterin vurulması ilə bağlı AÇIQLAMA

ATƏT-in Minsk qrupunun həmsədrləri İqor Popov (Rusiya), Ceyms Uorlik (ABŞ) və Pyer Endryu (Fransa) Azərbaycan və Ermənistan Silahlı Qüvvələrinin təmas xətti yaxınlığında vurulmuş helikopterlə bağlı narahatlığını bildiriblər. Trend ATƏT-in saytında yerləşdirilmiş bəyanata istinadən bu barədə məlumat verir.

Xatırladaq ki, noyabrın 12-də saat 13:45 radələrində cəbhənin Ağdam rayonunun Kəngərli kəndindən 1700 metr şimal-şərq istiqamətində Ermənistan SQ-yə məxsus Mi-24 tipli helikopter döyüş kursuna enərək mövqelərimizə hücum edib. Qoşunlarımız tərəfindən açılan cavab atəşi nəticəsində düşmən helikopteri məhv edilib.

Hazırda vurulan düşmən helikopterinin qalıqları müdafiənin ön xəttindən 500 metr qarşıdakı əraziyə düşüb.

ATƏT-in Minsk Qrupunun həmsədrləri münaqişə tərəflərini Azərbaycan və Ermənistan qoşunlarının təmas xəttində və Ermənistan-Azərbaycan sərhədində gərginliyin artmasına gətirib çıxara bilən addımlardan qaçmağa çağırıblar.

Bəyanatda deyilir ki, bu yay müşahidə olunan gərginliyin növbəti raunduna yol vermək olmaz.

"Bugünkü hadisələr Dağlıq Qarabağ münaqişəsinin davamlı həlli istiqamətində səylərin təcili fəallaşdırılması zərurəti barədə bizə xatırladır. Biz yenə də istənilən mümkün formada tərəflərə yardım göstərməyə hazırıq", - bəyanatda deyilir.

ATƏT-in Minsk Qrupu münaqişənin sülh yolu ilə həllini tapmağa, eləcə də təmas xətti boyunca və Ermənistan-Azərbaycan sərhədində şəffaflığı artırmağa imkan verən etibarın möhkəmlənməsi üzrə tədbirlər görməyə tərəfləri çağırır.

Münaqişə 1988-ci ildə Ermənistanın Azərbaycana ərazi iddiaları səbəbindən Cənubi Qafqaz ölkələri arasında yaranıb. Azərbaycan ərazisinin 20 faizi olan Dağlıq Qarabağ və ona bitişik yeddi rayon - Ermənistan silahlı qüvvələrinin işğalı altındadır.

1994-cü ilin mayında tərəflər atəşkəsə nail olublar və indiyə qədər ATƏT-in Minsk qrupunun himayəsi altında və Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

İşğal olunmuş Dağlıq Qarabağ və ətraf ərazilərin azad edilməsi üzrə BMT Təhlükəsizlik Şurasının qəbul etdiyi dörd qətnamə Ermənistan tərəfindən bu günə qədər yerinə yetirilməyib.

Milli.Az