Siyasət

Panamada Azərbaycanın diplomatik nümayəndəliyinin açılacağı gözlənilir - FOTO

13 Avqust 2013 10:21

Baxış: 1 290

#SİYASƏT #PANAMA

Azərbaycanın Meksikada və eyni zamanda Panamadakı səfiri İlqar Muxtarov Panama xarici işlər naziri Fernando Nunyez Fabreqa ilə görüşüb.

Azərbaycanın Meksikadakı səfirliyindən Trend-ə verilən məlumata görə, səfir görüşdə Azərbaycanın Panama ilə dostluq əlaqələrinin yaradılmasında və əməkdaşlığın genişləndirilməsində maraqlı olduğunu bildirib.

Səfir, həmçinin cari ilin sonunadək Panamada ölkəmizin diplomatik nümayəndəliyinin açılacağı barədə məlumat verib.

Diplomat ölkəmizin yaxın siyasi tarixi, Azərbaycanda dövlətçiliyin inkişafı, Azərbaycanın Cənubi Qafqazda iqtisadiyyatının 80 faiz təşkil etməsi ilə regionda lider ölkə olduğu, habelə Ermənistan-Azərbaycan, Dağlıq Qarabağ münaqişəsi barədə nazir Fernando Nunyez Fabreqaya bəhs edib.

Ermənistanın Azərbaycana qarşı işğalçılıq siyasətindən danışaraq səfir İ.Muxtarov münaqişənin tarixi və nəticələri, Xocalı soyqırımı haqqında Panama xarici işlər nazirinə məlumat verib.

Öz növbəsində, nazir Fernando Nunyez Fabreqa Azərbaycanın Panamada diplomatik nümayəndəliyinin açılmasında maraqlı olduğunu bildirərək, bunun Panama-Azərbaycan əlaqələrinin yaxınlaşmasına xidmət edəcəyini qeyd edib.

Görüşün sonunda səfir Panama XİN başçısını Azərbaycana səfərə dəvət edib. Panamaya səfər zamanı Muxtarov Panama Parlamentində müxtəlif görüşlər keçirib, parlamentlərarası əlaqələrin qurulmasında qarşılıqlı səfərlərin təşkil olunmasının vacib əhəmiyyətini qeyd edib və ölkəmizin Panama ilə siyasi, iqtisadi, mədəni və digər sahələrdə əməkdaşlıqda maraqlı olduğunu vurğulayıb.

Azərbaycan səfiri Ermənistan-Azərbaycan Dağlıq Qarabağ münaqişəsi, Ermənistanın Azərbaycana qarşı işğalçılıq siyasəti nəticəsində bir milyondan artıq soydaşımızın qaçqın və məcburi köçkünə çevrildiyi, Xocalı soyqırımı haqqında və bu soyqırımının beynəlxalq səviyyədə tanınması prosesindən söz açaraq, son zamanlar dünyanın müxtəlif ölkələrinin, habelə Latın Amerikası ölkələrinin parlamentləri tərəfindən Ermənistanın təcavüzü və Xocalı soyqırımına dair qəbul edilmiş qətnamələr barədə Panama parlamentinin üzvlərini məlumatlandırıb.

Milli.Az

Böyütmək üçün şəkillərə klikləyin.