Siyasət

"NATO Putinə təzyiqi artırır"

4 Sentyabr 2025 23:51

Baxış: 1 925

#PUTİN

"NATO-nun baş katibi Mark Rütte alyansın müttəfiqlərinə xəbərdarlıq edərək Rusiya ilə ümumi sərhədi olmayan ölkələrin də onun ən yeni raket texnologiyalarına görə təhlükə altında olduğunu bildirib. O, bunu Lüksemburqda keçirilən mətbuat konfransında deyib.Təhlükənin alyansın bütün üzvlərinə aid olduğunu bir daha vurğulayan baş katib ABŞ-nin NATO-nun maraqlarına sadiqliyini təsdiqləyib".

Milli.Az xəbər verir ki, bunu siyasi şərhçi Kənan Novruzov bildirib:

"Rusiya üç ildir Ukrayna müharibə aparmasına, Qərbin təzyiqlərinə məruz qalmasına baxmayaraq, NATO hələ də onun haqqında ehtiyatla danışır. Görünür, Moskva özünün hegemonluğunu qorumağı bacarır. Təbii ki, bu, təsadüfi verilən açıqlama deyil. Baş katibin səsləndirdiyi fikirlərin Qərb ölkələrində ciddi ajiotaj yaratması da mümkündür".

O qeyd edib ki, faktiki olaraq bataqlıqda olmasına baxmayaraq Rusiya hələ də müəyyən siyasi, iqtisadi və hərbi imkanlara malikdir. Kreml bu gün, demək olar, bütün Qərblə mübarizə aparır. Amma müqavimət göstərə bilər. Ola bilsin, elə bu müqavimətin özü də NATO-nu qorxuya salıb. M.Ruttenin açıqlamasını iki cür başa düşmək olar. Birincisi, ola bilsin, NATO Rusiyanın gücünü qabardaraq gələcəkdə hansısa formada güzəştə getməyə hazırlaşır:

"İkincisi, ola bilsin, NATO bunu əsas götürərək güclənmə və özünümüdafiə adı ilə Rusiyaya qarşı təzyiqləri artıracaq. Məncə, indiki situasiyada ikinci variant daha inandırıcı görünür. Hərçənd təşkilat daxilində Rusiya ilə münasibətlərin gərginləşməsində maraqlı olmayan aktorlar da var. Ən azından Alyansın ikinci dövləti olan Türkiyə bunu istəmir.

Gələcəkdə NATO-nun Rusiyaya təzyiqləri artırması mümkündür".

Asya
Milli.Az