Siyasət

Diasporla İş üzrə Dövlət Komitəsi Rusiyanın “Azərbaycan diasporu” adlı saxta teleqram kanalıyla bağlı açıqlama yayıb

29 İyun 2025 22:08

Baxış: 678

#SİYASƏT

Rusiyanın "Azərbaycan diasporu" adlı saxta teleqram kanalında "Azərbaycan icması Bakını Moskva ilə münasibətləri pozmaqda ittiham edib" başlıqlı yazı dərc olunub.

Azərbaycan Respublikasının Diasporla İş üzrə Dövlət Komitəsi Trend-ə bildirilib ki, yazı Rusiyada Azərbaycan diaspor üzvləri ilə bağlı son hadisələrlə əlaqədar təxribat xarakterli bəyanatdır və bu bəyanatın Rusiyadakı Azərbaycan diasporuna heç bir aidiyyatı yoxdur. Saxta teleqram kanalının belə bir məlumat yayması ölkəmizə və Rusiyada yaşayan soydaşlarımıza qarşı yönələn təxribatdır.

"Heç bir həqiqəti əks etdirməyən, təxribat xarakterli həmin yazıya istinad olunması, diasporun mövqeyi kimi ictimaiyyətə təqdim olunması yolverilməzdir. Media nümayəndələrindən belə bir həssas məqamda diqqətli olmağı xahiş edirik", - Komitədən bildirilib.

Milli.Az