Dünya azərbaycanlı alimlərinin Bakı Forumu: birlikdən güc doğur - FOTO

Azərbaycanın elm və təhsil sahəsində atdığı addımlar və xaricdə yaşayan azərbaycanlı alimlərlə əlaqələrin gücləndirilməsi istiqamətində mühüm bir mərhələ olan Xaricdə Yaşayan Azərbaycanlı Alimlərin Forumu, sentyabrın 9-dan 11-dək Bakıda baş tutdu. Bu forum, yalnız bir elmi tədbir olmaqla qalmayıb, həm də Azərbaycan diasporunun güclənməsinin, dünya miqyasında azərbaycanlı alimlərin bir araya gəlməsinin göstəricisi olaraq tarixi bir hadisəyə çevrildi.

Forumda 23 ölkədən 80-dən çox azərbaycanlı alim, ölkəmizdən isə 200-ə yaxın elm xadimi iştirak edib. Bu cür genişmiqyaslı tədbirin təşkili Azərbaycanın elm və təhsil sahəsində dünya miqyasında tanınan alimlərlə əməkdaşlığının artırılmasına şərait yaratmaqla yanaşı, ölkəmizin elmi potensialının beynəlxalq arenada daha da güclənməsinə zəmin hazırlayır. Diasporla İş üzrə Dövlət Komitəsinin, Elm və Təhsil Nazirliyinin və Dünya Azərbaycanlı Alimlər Dərnəyinin təşkilatçılığı ilə baş tutan bu forum Azərbaycanın elm siyasətində yeni yanaşmaların təməlinin qoyulmasını təmin edir.

Forumun əsas məqsədlərindən biri, xaricdə yaşayan azərbaycanlı alimlərin Azərbaycan elminin və ali təhsilin inkişafına töhfə verməsi, onların yerli elm xadimləri ilə əlaqələrinin möhkəmləndirilməsi, həmçinin işğaldan azad edilmiş ərazilərin bərpasında onların bilik və təcrübələrindən istifadə edilməsidir. İştirakçılar arasında müxtəlif sahələrdə fəaliyyət göstərən alimlərin olması bu məqsədlərin həyata keçirilməsində müstəsna əhəmiyyət daşıyır.

Forum çərçivəsində alimlərin erməni işğalından azad edilmiş ərazilərə - xüsusilə Şuşa və Xankəndiyə səfərləri həm tarixi baxımdan, həm də elmi potensialın inkişafı nöqteyi-nəzərindən önəmli idi. Qarabağ Universitetində keçirilən görüşlər, Qarabağ regionunda təhsilin və elmin inkişafı üçün beynəlxalq səviyyədə tanınan alimlərin töhfəsinin zəruriliyini bir daha ortaya qoydu.

Şuşa şəhəri işğaldan azad olunduqdan sonra Azərbaycanın mədəniyyət və elmi mərkəzlərindən birinə çevrilməkdədir. Məhz Qarabağ Universitetinin açılışı bu istiqamətdə atılmış ən mühüm addımlardan biri hesab edilir.

Forum çərçivəsində keçirilən müzakirələr zamanı xaricdə yaşayan azərbaycanlı alimlərin Azərbaycanda elmin və təhsilin inkişafında oynaya biləcəyi rol ön plana çəkilib. Alimlər Azərbaycanın elm və təhsil sisteminə beynəlxalq tələbə və professorların cəlb edilməsi, elmi mübadilələrin həyata keçirilməsi kimi mövzuları ətraflı müzakirə ediblər. Bu istiqamətdə müsbət nəticələrin əldə edilməsi, ölkəmizin elmi potensialının beynəlxalq miqyasda tanınmasına şərait yarada bilər.

Elm və təhsil naziri Emin Əmrullayev forumda çıxış edərək son on ildə Azərbaycanda təhsil və elm sahəsində həyata keçirilən uğurlu islahatlar barədə məlumat verib. Nazir, xaricdə təhsil alan azərbaycanlı gənclərin ölkəyə qayıdaraq öz bilik və təcrübələrini bölüşmələrinin önəmini vurğulayıb və alimlərimizin bu prosesdə aparıcı rol oynamasının zəruriliyini qeyd edib. Elm adamları Azərbaycanın gələcək inkişafı üçün potensial təşəbbüsləri və layihələri müzakirə edərək, bu sahədə birgə addımlar atılmasının əhəmiyyətini qeyd ediblər.

Forumun diqqət çəkən məqamlarından biri də işğaldan azad edilmiş ərazilərin bərpasında azərbaycanlı alimlərin bilik və təcrübələrindən istifadə məsələsi oldu. Qarabağ Universiteti ilə gələcək əməkdaşlıq perspektivləri, bölgənin elmi və təhsil potensialının artırılması istiqamətində müzakirələr aparılıb.

Diasporla İş üzrə Dövlət Komitəsinin sədri Fuad Muradovun sözlərinə görə, Qarabağ Universitetində dünya miqyaslı alimlərin fəaliyyəti Azərbaycanın elm sahəsinə ciddi töhfə ola bilər. Bu, eyni zamanda, Azərbaycan dövlətinin elm və təhsilə, alimlərə göstərdiyi dəstəyin bariz nümunəsidir.

Xaricdə yaşayan azərbaycanlı alimlərin Qarabağın bərpası və inkişafı prosesində iştirakı yalnız elmi sahədə deyil, həm də mədəni və iqtisadi cəhətdən regionun yenidən qurulmasına mühüm töhfələr verə bilər. Qarabağ Azərbaycanın gələcək inkişaf strategiyasında əsas rol oynayan bölgələrdən biri olduğu üçün alimlərimizin bu prosesə aktiv şəkildə qatılması vacibdir.

Xaricdə yaşayan alimlərimizin bu cür forumlarda iştirak etməsi, onların elmimizin daha da inkişafına töhfə verə biləcəkləri barədə əminlik yaradır.

ADA Universitetinin rektoru Hafiz Paşayev forumda çıxış edərək xaricdə yaşayan alimlərin Azərbaycanın elmi inkişafında oynadığı rolu vurğulayıb. Paşayev qeyd edib ki, yeni dövrün tələblərinə cavab verən kadrların hazırlanması, azərbaycanlı alimlərin bilik və təcrübələrinin ölkəmizdə tətbiq olunması zamanın tələbi və gələcək inkişafın təminatıdır.

Diaspor fəaliyyətinin ölkəmizin tanıdılması baxımından əhəmiyyətli olduğunu qeyd edən Diasporla İş üzrə Dövlət Komitəsinin sədri Fuad Muradov forumda xaricdə yaşayan alimlərin Azərbaycan elminə olan töhfələrinin daha da artırılması üçün yeni təşəbbüslərin həyata keçirilməsi barədə planlarını açıqlayıb. Alimlərin şəbəkələşməsi və birgə layihələrin həyata keçirilməsi diasporun gücləndirilməsinə böyük təkan verəcək.

Xaricdə Yaşayan Azərbaycanlı Alimlərin Forumu, Azərbaycanın elm və təhsil siyasətində yeni bir dövrün başlanğıcı hesab edilə bilər. Alimlərin bir araya gəlməsi, bilik və təcrübə mübadiləsinin aparılması, Qarabağın bərpası prosesinə töhfələr verilməsi, Azərbaycanın beynəlxalq elmi əlaqələrinin gücləndirilməsi bu forumun əsas nailiyyətlərindəndir. Bu cür tədbirlər, Azərbaycanın elminin gələcək inkişafında və beynəlxalq miqyasda tanınmasında mühüm rol oynayacaq.

Forum yalnız elmi müzakirələrin və bilik mübadiləsinin aparıldığı bir platforma olmaqla kifayətlənməyərək, həm də Azərbaycan elmi ilə xaricdə yaşayan alimlər arasında yeni, möhkəm əlaqələrin qurulmasına böyük təkan verdi. Sözügedən tədbir dünyanın müxtəlif ölkələrində yaşayan azərbaycanlı alimlərin Azərbaycanda elmin inkişafında oynaya biləcəyi mühüm rolu önə çəkərək, onların bilik və təcrübələrinin ölkəmizin elmi siyasətinə inteqrasiya edilməsinin vacibliyini vurğuladı. Bu istiqamətdə forumun rolu danılmazdır, çünki burada yaradılan əlaqələr gələcək elmi əməkdaşlıqların təməlini qoydu.

Forumun mühüm əhəmiyyət daşıyan tərəflərindən biri də xaricdə yaşayan azərbaycanlı alimlərin elmimizin inkişafına verdikləri töhfələrin artırılması üçün yeni imkanlar yaratması oldu. Forumda bir araya gələn alimlər arasında qarşılıqlı maraq doğuran məsələlər və layihələr müzakirə edildi, gələcəkdə birgə həyata keçirilə biləcək elmi istiqamətlər təhlil olundu. Bu, alimlərin beynəlxalq səviyyədə tanınmasına, eləcə də, Azərbaycan elminin qlobal miqyasda mövqeyinin möhkəmləndirilməsinə xidmət edəcək.

Bu forum, həmçinin, xaricdə yaşayan azərbaycanlı alimlərin Azərbaycanla əlaqələrinin möhkəmləndirilməsi, onların elmi potensialının ölkəmizin inkişafında daha da səmərəli istifadəsinə yol açdı. Məhz bu səbəbdən, forum Azərbaycan elmi üçün yeni sahələrin və istiqamətlərin müəyyən edilməsində həlledici rol oynayan mühüm bir vektor oldu. Xaricdə yaşayan alimlərin Azərbaycan elminin beynəlxalq arenada təbliğində və mövqeyinin gücləndirilməsində aparıcı rola malik olacağına əminlik yarandı.

Forumun nəticəsi olaraq alimlərimiz arasında şəbəkələşmə prosesləri sürətləndi, elmi əlaqələr daha da möhkəmlənəcəkvə Azərbaycan elmi üçün yeni perspektivlər açılacaq.

Forum,Azərbaycan elmi və xaricdə yaşayan azərbaycanlı alimlər arasında əlaqələrin qurulmasında, yeni inkişaf istiqamətlərinin təyin edilməsində çox mühüm bir mərhələ olacaq. Sonucda Bakı forumu həm Azərbaycan elminin, həm də alimlərimizin qlobal səviyyədə tanınması üçün yeni imkanlar yaratmaqla, elmi əlaqələrin gücləndirilməsi istiqamətində böyük bir addım kimi yadda qalacaq.

Orxan Hun
Milli.Az