Ermənistana görə Azərbaycandan QİSAS ALMAQ İSTƏYİRLƏR

"30 il ərzində Azərbaycan torpaqları işğal altında olarkən, ya da insan hüquqları ilə bağlı hesabatlar hazırlanarkən "Human Rights Watch" (HRW) təşkilatı Azərbaycana qarşı hər zaman qərəzli mövqe nümayiş etdirib, qeyri-obyektiv mövqe tutub".

Bunu Milli.Az-a açıqlamasında politoloq Şəbnəm Həsənova deyib.

O bildirib ki, təşkilat Azərbaycanın əleyhinə informasiya manipulyasiyası ilə məşğuldur:

""Human Rights Watch" (HRW) təşkilatının təsisçiləri içərisində ermənilərin olduğu, ya da erməni lobbisinin təsiri altında olan qüvvələrin mövcudluğu faktını nəzərə alsaq bu qeyri-hökümət təşkilatının başqa mövqe tuta bilməsi fikri belə absurd olar. Nəzərə alsaq ki, müasir dövrdə müharibənin hybrid forması daha aktual xarakter alıb, sözügedən təşkilat da "zamanın nəbzini tutaraq" rəqəmləri təhrif etməklə Azərbaycana qarşı informasiya müharibəsi aparır. 

"Human Rights Watch" (HRW) təşkilatının 2021-ci il üzrə hesabatı tamamilə qeyri-obyektiv və qərəzlidir. Hesabatla tanışlıqdan sonra belə qənaətə gəlinir ki, sanki "Human Rights Watch" 44 günlük müharibəyə görə Azərbaycandan qisas alır. HRW ekspertləri ən böyük xətanı da məhz "Altı günlük müharibəsinin doğurduğu nəticələr" bölümündə törədiblər. Nəticələri saxtalaşdırıblar. Savaşın və dağıntıların günahını birmənalı şəkildə Azərbaycanın ayağına yazmağa çalışıblar. Müəlliflər elə cümlələr qurub, elə terminlər işlədiblər ki, sanki Azərbaycan işğal altında olan ərazilərini azad etməyib. Əksinə, Ermənistana hücum edərək onun torpaqlarını ələ keçirib. Təkcə ifadələr, cümlələr deyil, rəqəmlər, arqumentlər də ziddiyyətlidir. 

Təşkilat tərəfindən Azərbaycanın Gəncə, Bərdə, Tərtər şəhərlərində törədilən terror nəticəsində dinc insanlarımızın həlak olması ilə yanaşı mülki strukturlara dəyən zərərlə bağlı obyektiv məlumatların işıqlandırılmalı olduğu halda, sözügedən təşkilatın Azərbaycan tərəfinin müharibənin getdiyi bir vaxtda Ermənistan ərazisində 71 məktəbi dağıtması faktını iddia etməsi Azərbaycana qarşı aparılan yalan və böhtan kampaniyasından xəbər verir. Təşkilat informasiya manipulyasiyası ilə məşğuldur. Azərbaycana qarşı aparılan mübarizə yalan üzərində formalaşdırılıb. Bu hesabatlar öncədən planlaşdırılmış ssenari üzrə işləyir və bəllidir ki, müəyyən və bəlli mərkəzdən koordinasiya edilir. İllərlə Azərbaycana edilən insan hüquqlarının pozulması kimi təqiblər və təzyiqlər kimi uydurma tezislərlə Azərbaycanın torpaqlarını işğaldan azad etməsi əzmini qırmağa çalışan bu cür təşkilatlar indi də Azərbaycanın yaratmış olduğu reallıqla barışa bilmir, uğurlarımızı həzm edə bilmirlər. 

Bu gün reallıq ondan ibarətdir ki, Azərbaycan regionda yeni reallıq yaradıb, qalib tərəf olaraq Ermənistana sülh təklif edir. Azərbaycan əməkdaşlıq platformalarına açıq olduğunu bildirməklə, ermənilərin regiona reinteqrasiyasını təklif etməklə qeyri-humanist və insan hüquqlarını kimin pozduğu sualına cavabını çox açıq verir. Müharibə bitsə də, yumşaq güc və təzyiq vasitəsi kimi informasiya savaşı davam edir və bu istiqamətdə də Azərbaycan sistematik və koordinasiyalı iş həyata keçirərək bu kimi qüvvələrin qarşısında qətiyyətlə dayanır".

Təhməz Əsədov
Milli.Az