Maraqlı

Avropa İttifaqında avtomobil satışında rekord azalma qeydə alınıb

18 Noyabr 2020 22:25
Baxış: 531

Avropa İttifaqı ölkələrində minik avtomobillərin satışı 2020-ci ilin ilk 10 ayında rekord dərəcədə - 26,8 faiz azalıb.

Milli.Az AZƏRTAC-a istinadən bildirir ki, bu barədə məlumat Avropa Avtomobil İstehsalçıları Assosiasiyasının aylıq hesabatında yer alıb.

"2020-ci ilin yanvar ayından oktyabradək Avropa İttifaqının 27 ölkəsində 8 milyon yeni minik avtomobili qeydiyyatdan keçib ki, bu da ötən ilin analoji dövrü ilə müqayisədə 2,9 milyon ədəd azdır. Ümumilikdə isə ilin ilk on ayı ərzində avtomobil satışında misli görünməmiş eniş müşahidə olunub - 26,8 faiz", - assosiasiyanın təqdim etdiyi məruzədə belə deyilir.

Avropa İttifaqının aparıcı ölkələrində ən çox azalma İspaniya (36,8 faiz) və İtaliyada (30,9 faiz) qeydə alınıb. Fransada bu göstərici 26,9 faiz, Almaniyada isə 23,4 faiz təşkil edib.

Məruzədə qeyd olunur ki, avtomobil satışları 2020-ci ilin ilk səkkiz ayı ərzində azaldıqdan sonra karantin tədbirlərinin yay zəifləməsinin nəticələrinin hiss olunduğu sentyabrda bir qədər artıb (avqust ayı ilə müqayisədə +3,1 faiz). Lakin oktyabrda pandemiyanın ikinci dalğasının baş qaldırmasına paralel olaraq eniş göstəriciləri təkrarlanıb və sentyabr ayı ilə müqayisədə 7,8 faizə çatıb.

Məlumata əsasən, "Volkswagen" avtomobillərinin satışı 28,9 faiz, "Peugeot" avtomobillərinin satışı 26 faiz, "Renault" avtomobillərinin satışı 25,3 faiz, "Mercedes" və "Toyota" avtomobillərinin satışı 16,7 faiz, "Kia" avtomobillərinin satışı isə 15,8 faiz aşağı düşüb.

Bu göstəriciyə görə liderlər sırasında "Smart" (78 faiz azalma), "Alpine" (76,9 faiz), "Lada" (56,5 faiz), "Jaguar" (50,4 faiz) və "Opel" (45,8 faiz) kompaniyaları yer alıb.

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.