Maraqlı

İnternetdən istifadə üzrə əsas tendensiyalara həsr edilən hesabat dərc olunub

18 Fevral 2020 07:01
0 Şərh     Baxış: 303

İnternet tədqiqatlarında ixtisaslaşan "We Are Social" beynəlxalq agentliyi dünyada internetdən istifadə üzrə əsas trendlərə həsr olunan hesabat dərc edib.

Milli.Az ictnews.az-a istinadən bildirir ki, ekspertlərin məlumatına görə, 2019-cu ildə dünyada internet istifadəçilərinin auditoriyası 7 faiz (298 milyon istifadəçi) artaraq 4,54 milyard nəfər, sosial şəbəkələrdə qeydiyyatdan keçən istifadəçilərin sayı isə 3,8 milyard təşkil edib. Bundan başqa, mobil qurğu istifadəçilərinin ümumi sayı 5,19 milyard nəfərə çatıb. Hesabatda, həmçinin istifadəçilərin fərdi kompüter və mobil qurğulardan gündəlik istifadə vaxtı nəzərə alınıb.

Bu vaxtın dünya miqyasında orta göstəricisi 6 saat 43 dəqiqə təşkil etməklə ötən ilin nəticəsindən 3 dəqiqə azdır, lakin ildə bir istifadəçi üçün 100 gün çoxdur. Gündəlik yuxunun tövsiyə edilən vaxtının 8 saat təşkil etməsi nəzərə alınmaqla insanların oyaq qalmasının 40 faizi internetdə keçir.

İnternet asılılığı siyahısına Filippin istifadəçiləri başçılıq edir. Tədqiqata görə, onlar gündə 10 saat internetdə olurlar. İlk beşliyə, həmçinin gündə 9 saat onlayn olan Cənubi Afrika, Braziliya, Kolumbiya və Tailand istifadəçiləri daxildir. Maraqlıdır ki, Yaponiya reytinqdə sonuncu yeri tutub. Bu ölkənin internet istifadəçiləri gündə 4 saat 22 dəqiqə virtual məkanda olurlar.

Statistikaya görə, hazırda dünya əhalisinin ümumi sayının 40 faizi internetdən istifadə etmir - 3,2 milyard insan internetə çıxış imkanından məhrumdur. Bu göstərici Cənubi Asiyada 1 milyard (ümumi sayın 31 faizi) təşkil edir. Afrika ölkələrinin payı isə 27 faizə bərabərdir.

Milli.Az

loading...

Şərh yaz:

0 Şərh:

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.