Rənglərin insana nə kimi təsiri var?

Hər birimiz gündəlik geyimlərimizdə, evdə, işdə və s. sevdiyimiz bir neçə rəngdən istifadə edirik. Rənglər bizim əhavalımıza, səhhətimizə təsir edir, eləcə də üzümüzün təravətli, gözlərimizin gözəl görünməsinə, hətta vücudumuzun çatışmazlıqlarını gizlətməyə kömək edir.

Psixoloq Lalə Əhmədovanın sözlərinə görə, qırmızı canlılıq və dinamizmlə bağlı bir rəngdir: "Bir işi axıra qədər görən, əzmli, səmimiyyətdən xoşlanan insanların seçimidir. Qırmızı insanların diqqətini çəkir. Qırmızı rəng zamanı və məkanı da unutdurur. Enerjini və iştahı artırır. Bu rəng qida sektorunda daha çox istifadə olunur. Qırmızi sevgi rəngidir, insanı eşqə sürükləyir. Ona görə bəzən qırmızını "sevən insanların rəngi" adlandırırlar".

L.Əhmədova bildirib ki, sarı rəng zəka, incəlik, zərifliklə bağlıdır. Birlikdə işləməyə sövq edir: "Zehni açır və neqativ enerjilərin bizi vurmasını əngəlləyir. Bizi bəzi qayda-qanunlardan, çərçivələrdən çıxarmağa həvəsləndirir. Sarı rəngin təsirindən insan özünü daha da sərbəst hiss edir. İnsana sevinc hissi bəxş edir, yorğunluğu bədəndən uzaqlaşdırır. Əgər günə yorğun və kefsiz başlamısınızsa, həmin gün üstünüzdə sarı akssesuar daşımağınız məsləhətdir. Məsələn, qızıl əşyalar da bizim enerjimizi artırmağa köməklik edir".

Yaşıl rəng ahəng, rahatlıq, səbr və islamın rəngidir. İnsandakı ruhi yorğunluğu götürmə özəlliyi var. Bu rəng insanda özünə güvən hissini artırır. Həmsöhbətimizin sözlərinə görə, yaşıl təbiətin, qəlbimizin, ağ ciyərlərimizin rəngidir: "Yaşıl rəng hadisələrə hakimiyyətimizi artırmağa, mənəvi dünyamızı rahatlandırmağa köməklik göstərir. Əsəbləşdiyiniz an yaşıla baxın, çünki yaşıl terapiyadır. Beynimizi və sinirlərimizi sakitləşdirir. Cildi qoruma özəlliyi var".

Mavi rəng isə aydın səmanın, geniş üfüqün rəngidir. Sonsuzluğa cağırış, ruhi rahatlıq mənəvi təkamülün, dənizlərin rəngidir. Mavi ruhumuzu sakitliyə səsləyir. "Qırmızı rəngdən fərqli olaraq mavi qanın axınını yavaşlandırır. Mavi rəng istər-istəməz insanı sakitləşdirir. Misal üçün, İsveçdə bir körpü mavi rəngə boyandıqdan sonra orada baş verən intiharların sayı azalıb. Kilo vermək istəyən xanımlara yeməklərini mavi rəngli boşqablarda yemək məsləhətdir".

Ağ rəng saflıq, təmizlik, yeni başlanğıcların və barışığın rəngidir. Ağ müqəddəslik duyğusunun rəngi sayılır. Bu rəngi sevən insanlar təmizliyə, saflığa və münasibətlərdə aydınlığa daha çox fikir verirlər. İnsanlar bəzən keçmişi xatırlamaq istəməyəndə həyatlarında yeni bir ağ səhifə açmaq istəyirlər. Bu da öz növbəsində ağın yeniliyə açılan bir qapının rəngi olduğunu bildirir. İnsanlar bəzən bir-birlərinə "Ağ günlər sizin olsun" deyirlər ki, bu da ağın gücünü bir daha təsdiqləyir.

Müsahibimizin dediyinə görə, qəhvəyi rəng təbiətin, payız fəslinin rəngidir. Plan və sistemin, həqiqiliyin rəngidir. Qəhvəyinin insanlar üzərində canlılıq, hərəkətlilik kimi təsiri var. Bu rəng insan beyninin funksiyalarını sürətləndirir, hərəkətə gətirmə funksiyası var. Qəhvəyi rəngin bol olduğu yerlərdə uzun müddət oturmaq olmur. Ona görə də cəld yeməklərin təqdim olunduğu restoran və kafelərdə bu rəngdən çox istifadə olunur: "Qəhvəyi rəng "cəld ol" əmrini verir. Bəzən də bizi qəmli fikirlərə sövq edir. Yarpaqların saralıb tökülməsi bizə sürətle axıb gedən ömrümüzün keçib getdiyini xatırladır".

Narıncı rəng güc, dözümlülük rəngidir. İstiliyi, atəşi və təlaşı anladır. Nəşə və müdrikliyin simvoludur. İnsanlarda sosiallaşmaq duyğusunu artırır. Bununla belə, tamamilə bu rəngə boyanmaq məsləhət deyil. Narıncı rəngdə olan xırda akssesuarlardan istifadə daha müsbət təsir gücünə malikdir.

Çəhrayı rəngə üstünlük verənlər həssas və pozitiv olub, öz sevgilərini qabarıq şəkildə ifadə edirlər. Bundan əlavə, onlar küsəyən olmaqları ilə fərqlənirlər. Amma kinli olmadıqları üçün pisliyi tez də unudurlar.

Qara rəng ən çox yayılmış və ziddiyyətli rəngdir. Bu rəngdən həyatın bir çox sahələrində istifadə olunur. Qara rəngin mənası hər bir xalqda müxtəlifdir. "Qara rəng qara qüvvələr, ölüm və ya sirlə əlaqəlidir, insanda həyəcan hissi yaradır. Bu, rənglər sırasında nüfuzlu rəngdir. Ona görə də hökumət və dövlət maşınları adətən qara olur. Qara rəngi seçərkən diqqəti rəngə deyil, obyektin forma və məzmununa yönləndirmək lazımdır. Burada söhbət daha çox ənənələrin mühafizəkarlıq və öhdəliyindən gedir", - deyən L.Əhmədovaya görə, qara rəngdə yaş və vücud forması məhdudiyyəti yoxdur. Qara geyinərkən kəsim və tikiliş formasına diqqət yetirin, tərz çox sadə də ola bilər. Özünüzə simpatiyanızla cazibədarlığınızı işarə edin. Amma həddini aşmayın.

Psixoloq bildirib ki, insan boz geyinərkən şüuraltı görünməz olmağı arzulayır. Boz rəng özündə ağ-qaradan fərqli olaraq lazımsızlığını və heç vaxt birinci olmayacağını düşündürən keyfiyyətləri birləşdirir. Yeganə hədəfi stabillik və harmoniyadır.

Ekspress.az