Narıncı-qırmızı saçlı insanlarla bağlı gözlənilməz yeni fakt aşkarlanıb

Bu araşdırmanın aparılması yaxın zamanda kəşf edilən ML349 molekulu sayəsində mümkün olub.

Milli.Az xarici mediaya istinadən xəbər verir ki, narıncı-qırmızı saç rənginə cavabdeh olan genin yalnız xarici görünüşü müəyyən etmədiyi, həm də sağlamlıq baxımından müəyyən üstünlüklər verə biləcəyi məlum olub.

Alimlər hesab edirlər ki, bu gen həmin piqmenti istehsal edən hüceyrələri qorumağa kömək edir.

Sistein adlı molekul zülalların əsas "tikinti materiallarından" biridir və orqanizmdə zülal sintezi üçün vacib rol oynayır. Lakin hüceyrələrdə sisteinin miqdarı müəyyən həddən artıq olmamalıdır. Onun həddindən çox toplanması hüceyrələrin məhv olmasına səbəb ola bilər.

İnsanların qırmızı saçlarında, həmçinin bəzi quşların lələklərində rast gəlinən narıncı-qırmızı piqment - feomelanin məhz sisteinin iştirakı ilə yaranır.

Uzun illər alimlər bu piqmentin niyə təkamül prosesində qorunub saxlanıldığını izah edə bilmirdilər. Əvvəlki tədqiqatlar hətta feomelaninin ultrabənövşəyi şüalanma olmasa belə, dəri xərçəngi riskinin artması ilə əlaqəli ola biləcəyini göstərmişdi.

Buna görə də qırmızı saç rəngini formalaşdıran genetik xüsusiyyətlərin niyə nəsildən-nəslə ötürüldüyü sual olaraq qalırdı.

Artıq sisteini zərərsiz piqmentə çevirir

Yeni araşdırmanın nəticələrinə görə, feomelanin artıq sisteini hüceyrələrdən uzaqlaşdıraraq onun zərərli təsirinin qarşısını ala bilər.

Alimlər bildirirlər ki, bu, feomelaninin orqanizmdə yerinə yetirdiyi fizioloji funksiyanı ilk dəfə eksperimental şəkildə təsdiqləyən araşdırmadır.

ML349 molekulu araşdırmaya imkan yaradıb

Tədqiqatın həyata keçirilməsi feomelaninin sintezini bloklaya bilən ML349 molekulunun kəşfi sayəsində mümkün olub.

Alimlər narıncı dimdiyi feomelanin tərkibli olan 65 zebra amadinini araşdırıblar.

Quşlar iki qrupa bölünüb.

Eksperimental qrupdakı erkək quşlara qida ilə birlikdə həm sistein, həm də feomelaninin sintezini dayandıran ML349 preparatı verilib.

Nəticədə həm sistein, həm də ML349 qəbul edən quşların hüceyrələrində yalnız sistein qəbul edən quşlarla müqayisədə daha ciddi zədələnmələr müşahidə olunub./Lent.az

Müəllif: Ülkər Vəliyeva (Milli.Az redaktor)