Təyyarədə 19E oturacağında heç vaxt əyləşməyin

Tez-tez səyahət edən mütəxəssislər təyyarələrdə sərnişinlərin mümkün qədər qaçmalı olduğu bir oturacağa diqqət çəkiblər. Nə pəncərə mənzərəsi, nə də dəhliz rahatlığı təqdim edən bu yer, həm komfortu azaldır, həm də təyyarədən çıxış müddətini uzadır.

Milli.Az xəbər verir ki, təyyarə səfərlərində oturacaq seçimi səyahət təcrübəsinə birbaşa təsir edən ən mühüm amillərdən biri kimi önə çıxır. İllər boyu etdiyi saysız-hesabsız uçuşlardan sonra qiymətləndirmələr aparan bir səyahət mütəxəssisi sərnişinlərin imkan daxilində uzaq durmalı olduğu yerin təyyarələrin orta hissəsində yerləşən 19E oturacağı olduğunu bildirib.

Mütəxəssislərin fikrincə, 19E oturacağı sərnişinlərə demək olar ki, heç bir üstünlük qazandırmır. Təyyarənin orta sırasında yer alan bu oturacaq həm pəncərə mənzərəsindən zövq almaq imkanını sıfırlayır, həm də dəhliz tərəfinin təqdim etdiyi hərəkət azadlığını təmin etmir. İki yad sərnişin arasında sıxışıb qalmaq uzunmüddətli uçuşlarda yatmağı çətinləşdirir, tez-tez yerini dəyişmək məcburiyyəti isə səyahəti olduqca yorucu edir.

Həm pəncərədən, həm dəhlizdən məhrum
Pəncərə kənarında oturan sərnişinlər mənzərədən zövq ala bildiyi, dəhliz tərəfində əyləşənlər isə istədikləri vaxt ayağa qalxa bildiyi halda, orta oturacaqdakılar hər iki üstünlükdən məhrum olurlar. Bu səbəbdən də bura çox səyahət edən sərnişinlər tərəfindən ən arzuolunmaz yer kimi göstərilir.

Təyyarədən çıxışda da dezavantajlıdır
19E oturacağının mənfi tərəfləri təkcə uçuş zamanı yaşanan komfort çatışmazlığı ilə məhdudlaşmır. Təyyarənin tam ortasında yerləşməsi, enişdən sonra sərnişinlərin salondan ayrılma müddətini də uzadır.

Xüsusilə aşağı büdcəli (low-cost) aviaşirkətlərdə sərnişin körpüsü (teleskopik nərdivan) əvəzinə avtobuslardan istifadə edildiyi üçün həm ön, həm də arxa qapılar aktiv şəkildə açılır. Belə hallarda təyyarənin orta hissəsindəki sərnişinlər çıxış nöqtələrinə ən uzaq məsafədə qaldıqları üçün adətən təyyarədən ən son düşən şəxslər olurlar.

Tranzit uçuşlarda risk daha böyükdür
Qısa tranzit (aktarma) müddəti olan sərnişinlər üçün bu vəziyyət ciddi problemlərə yol aça bilər. Təyyarədən gec düşmək növbəti uçuşa yetişmək baxımından böyük vaxt itkisinə səbəb olur və bəzən reysi qaçırmaqla nəticələnir.

Lalə Qüdrətova
Milli.Az