Klassik suvaq dövrü tarix olur: Yeni sistem cəmi 6 saata boyana bilir

Ənənəvi suvaq tətbiqlərinə alternativ olaraq hazırlanan yeni nəsil örtük sistemi inşaat sektorunda diqqət çəkməyə başlayıb. "Gələcəyin suvağı" kimi təqdim edilən yeni məhsulun klassik qaba suvaq mərhələsini ortadan qaldırdığı və tətbiqdən cəmi 6 saat sonra boyana bildiyi qeyd edilir.

Milli.Az xəbər verir ki, mütəxəssislərin fikrincə, sistem xüsusilə uzun quruma müddətləri və sıx tikinti tullantıları səbəbindən tənqid olunan ənənəvi üsullara alternativ yaratmaq üçün hazırlanıb. Yeni suvaq texnologiyasının həm işçilik müddətini azaltdığı, həm də yenidən düzəliş ehtiyacını minimum səviyyəyə endirdiyi ifadə edilir.

Klassik suvaq tətbiqlərində səthin tamamilə quruması günlərlə vaxt ala bildiyi halda, yeni sistemdə bu müddətin bir neçə saata qədər düşdüyü bildirilir. İstehsalçı firmanın məlumatına görə, tətbiq birbaşa divar səthinə edilə bilir və əlavə qaba suvaq qatına ehtiyac qalmır.

Tədqiqatçılar bunun xüsusilə böyük yaşayış layihələrində ciddi zaman üstünlüyü təmin edə biləcəyini düşünürlər. Daha az material istifadə edilməsi və aşağı tullantı miqdarı səbəbindən sistemin xərcləri də azalda biləcəyi vurğulanır.

Yeni nəsil suvaq sisteminin diqqətçəkən tərəflərindən biri də tətbiq zamanı daha az toz və inşaat qalığı yaratmasıdır. Mütəxəssislərə görə, ənənəvi üsullarda rast gəlinən çat düzəlişləri və səth yeniləmə işlərinə bu sistemdə daha az ehtiyac duyulur.

Yeni sistemin xüsusi polimer qatqıları və sürətli quruya bilən kimyəvi komponentlər sayəsində klassik suvaqlardan fərqli işlədiyi qeyd edilir. Material tətbiq olunduqdan qısa müddət sonra səthdə bərkimə başlayır və təxminən 6 saat ərzində boya vurula biləcək səviyyəyə çatır.

Məhsulun əsas üstünlükləri:

Birbaşa kərpic, beton və blok səthlərə tətbiq oluna bilir.

Daha nazik qat halında istifadə edilə bilir.

Çatlama riskini minimuma endirməyi hədəfləyir.

Şirkət rəsmiləri yeni suvaq texnologiyasının iş qüvvəsinə olan ehtiyacı azalda biləcəyini və tətbiq proseslərini daha standart hala gətirəcəyini deyirlər. Xüsusilə artan inşaat xərcləri və zaman təzyiqi səbəbindən sektorun bu növ sürətli sistemlərə yönəlməyə başladığı ifadə edilir.

Braziliya mənşəli olan bu sistemin, xüsusilə sürətli təhvil verilməsi gərəkən böyük yaşayış binaları layihələrində geniş yayılacağı gözlənilir. Mütəxəssislərə görə, yaxın illərdə bənzər texnologiyalar klassik suvaq üsullarını tədricən əvəz etməyə başlaya bilər.

Lalə Qüdrətova
Milli.Az