Nostradamusdan təhlükəli 2026-cı il PROQNOZU: Bu qitənin sonu və "arıların" işğalı...

Məşhur fransız münəccimi Nostradamusun 2026-cı illə bağlı proqnozları yenidən gündəmə gəlib.

Milli.Az xarici mətbuata istinadən xəbər verir ki, onun əsrlər əvvəl qələmə aldığı dördlüklər müasir şərhçilər tərəfindən analiz edilərkən, bəşəriyyət üçün təhlükəli ssenarilərin təsvir edildiyi iddia olunur.

Bəzi tədqiqatçılara görə, Nostradamusun yazılarında 2026-cı ildə "arıların hücumu"na bənzər simvolik ifadələr yer alır. Bu obrazın birbaşa təbiət hadisəsi deyil, daha çox texnoloji və ya bioloji təhlükələri simvolizə etdiyi bildirilir. Şərhçilər "arılar" sözünü süni intellekt, pilotsuz uçuş aparatları, kütləvi nəzarət sistemləri və ya idarəolunmaz texnoloji proseslərlə əlaqələndirirlər. İddialara əsasən, bu "işğal" insan həyatına və dövlətlərin təhlükəsizliyinə ciddi təhdid yarada bilər.

Nostradamusun 2026-cı il üçün ən çox müzakirə edilən proqnozlarından biri isə Qərb sivilizasiyasının zəifləməsi ilə bağlıdır. Şərhlərə görə, onun mətnlərində siyasi parçalanma, iqtisadi böhranlar və sosial qarşıdurmalar nəticəsində Qərb ölkələrinin əvvəlki gücünü itirəcəyi ehtimalı vurğulanır. Bu prosesin uzunmüddətli böhranlara və qlobal güc balansının dəyişməsinə səbəb ola biləcəyi iddia olunur.

Bununla yanaşı, Nostradamusun proqnozlarında müharibə, xəstəliklər və iqlimlə bağlı ciddi sınaqların da yer aldığı bildirilir. Bəzi mənbələr 2026-cı ilin dünya üçün dönüş nöqtəsi ola biləcəyini, köhnə sistemlərin dağılaraq yeni nizamın formalaşacağını irəli sürür.

Qeyd edək ki, Nostradamusun proqnozları dəqiq tarix və hadisələri açıq şəkildə göstərmədiyi üçün müxtəlif cür şərh olunur və elm adamları tərəfindən daha çox simvolik mətnlər kimi dəyərləndirilir. Buna baxmayaraq, onun adının çəkildiyi hər proqnoz ictimai maraq doğurur və geniş müzakirələrə səbəb olur.

Hüseyn
Milli.Az