Maraqlı

Kann kinofestivalı başladı - FOTOSESSİYA

13 May 2010 10:46

Baxış: 1 661

#CANAL PLUS SA

Kinofestival qırmızı xalının üstündən keçid və "Robin Qud"un yeni ekran versiyasının nümayişi ilə başlayıb. Açılış mərasimini Fransanın Canal+ telekanalı yayımlayıb.

Ötən həftə Fransada baş verən görünməmiş qasırğaya, yüzlərlə təyyarə reyslərinin təxirə salınması ilə nəticələnən İslandiyada vulkan püsküpməsinə baxmayaraq, Kann festifalı cədvələ uyğun və yaxşı ənənələrin davam etdirilməsi ilə başlayıb.

Bu il hava o qədər də günəşli və isti olmayıb. Kann qonaqları dəyişkən buludlu hava ilə qarşılasa da, bu, mərasimə kölgə salmayıb. Xalçanın üstü ilə dünya kinematoqrafının ulduzları keçiblər. Onları kino həvəskarlarının alqışları müşayiət edib. Açılışa Yeva Lonqoriya, Ayşvariya Ray, Helen Mirren və Salma Hayek qatılıblar. Yeri gəlmişkən, Salma pərəstişkarlarına avtoqraf verməkdə xəsislik etməyib. Münsiflər heyətinin gəlişi də coşğu ilə qarşılanıb. Bu ilki heyətdə məşhur aktyorlar Keyt Bekinseyl və Benisio del Toro da var.

Mərasimin keçirildiyi zalda qonaqları britaniyalı aktrisa Kristin Skott Tomas qarşılayıb. O, münsiflər heyətinin üzvlərini təqdim edib. Simvolik olaraq, bir münsif yeri boş saxlanılıb. Bu yer iranlı kinorejissor Cəfər Pənahi üçün nəzərdə tutulub. Kann festivalının təşkilatçıları İranda insan hüquqlarının pozulmasına etiraz əlaməti olaraq, Cəfər Pənahini də münsiflər heyətinə dəvət ediblər. Amma o, gələ bilməyib.

Kinofestivalın qalibləri mayın 23-də elan olunacaq.

Milli.Az

--------------------------------------------------------------------------------