"36 min verdim, anamı öldürüb mənə verdilər” - FOTO

Respublika Diaqnostika Mərkəzində beyin əməliyyatı keçirən 67 yaşlı qadın vəfat edib.

Milli.Az Xəzər TV-yə istinadən bildirir ki, mərhumun qızı Lamiyə Quliyeva anasının ölümündə əməliyyatı icra edən neyrocərrah Tural Rəhimlini ittiham edir. O deyir ki, anası Ziyafət Səfiyeva 12 avqust tarixində Respublika Diaqnostika Mərkəzində həkim Tural Rəhimli tərəfindən xoşxassəli beyin şişi əməliyyatına götürülüb. Onlara əməliyyatın çox sadə və risksiz olduğu deyilsə də, sonradan xəstənin səhhətində ciddi ağırlaşmalar baş verib.

Lamiyə Quliyeva iddia edir ki, anası ikinci əməliyyatdan sonra da ağır vəziyyətdə 1 həftə reanimasiyada qalıb. Dediyinə görə, əməliyyatı icra edən həkim xəstəni nəzarətdə saxlamayıb və bütün işi rezidentlərinə tapşırıb.

Bu müddətdə xəstə yaxınları müalicə üçün xəstəxanaya və həkimə ümumilikdə 36 min manatdan çox vəsait ödəyib.

Lamiyə Quliyeva deyir ki, biopsiya nəticələrinə görə, xəstənin klinik müşahidə altında qalması tövsiyə olunsa da, həkim xəstəni evə buraxıb.

Şikayətçi bildirir ki, evə buraxılan anasının vəziyyəti daha da ağırlaşıb. Xəstə yaxınları 4 gün həkimə xəstəni yenidən xəstəxanaya qaytarması üçün təkid etdikdən sonra nəhayət, xəstə yenidən reanimasiya şöbəsinə qəbul edilib və vəziyyəti ilə bağlı müayinələrə başlanılıb.

İddialarla bağlı adı çəkilən neyrocərrah Tural Rəhimlinin mövqeyini öyrənməyə çalışdıq. Lakin onun nömrəsinə zəng çatmadı. Köməkçisi isə bildirdi ki, həkim məzuniyyətdədir.

Respublika Diaqnostika Mərkəzi ilə də əlaqə saxladıq. Bildirildi ki, hadisə ilə bağlı həkimlə birlikdə araşdırılma aparıldıqdan sonra ətraflı məlumat veriləcək.

Şikayətçi Lamiya Quliyeva isə hüquqi tədbirlərin görülməsi üçün aidiyyəti dövlət qurumlarına müraciət edəcəyini bildirir.

Daha ətraflı videomaterialı təqdim edirik.

Milli.Az