Hadisə

“Bizim kitabımızda boşanmaq yoxdur”

12 Avqust 2025 18:23

Baxış: 1 361

VTB-də minimal faiz dərəcəsi ilə nağd kredit 9.9%-dən

#HADİSƏ #BOŞANMA

Bakıda arvadına illərlə işgəncə verən şəxs həbs edilib.

Milli.Az qafqazinfo-ya istinadən xəbər verir ki, hadisə Suraxanı rayonunda baş verib.

İstintaq materiallarına əsasən, Elnur (şərti) 18 ildir nikahda olduğu Ayselə (şərti ) uzun müddət fiziki və psixoloji zorakılıq tətbiq edib. Son 8 ildə bu davranışlar daha da şiddətlənib.

Elnur həyat yoldaşını evdə bağlı qapı arxasında saxlayıb, ağzına yastıq basaraq boğmağa cəhd edib. Sonuncu dəfə isə dərzi qayçısı ilə müxtəlif xəsarətlər yetirib.

Ayselin sığınacağa üz tutmasından sonra hər şeyin üstü açılıb. Zərərçəkmiş başına gələnləri müstəntiqə etiraf edib. Şikayət əsasında Elnur cinayət məsuliyyətinə cəlb olunub, hökmə qədər ev dustaqlığında saxlanılıb.

Elnur məhkəmədə ittihamları qəbul etməyib. O, arvadının nevrozdan əziyyət çəkdiyini və dəfələrlə ondan özünü öldürməsini istədiyini deyib: "Aysel son vaxtlar əsəbi olur, məni təxribata çəkirdi. Əsəbi halda onu öldürməyimi tələb edirdi. Onu qapalı otaqda saxlamağım da düz deyil. Sadəcə qışqır-bağır salıb bizi biabır etməsin deyə balkona çıxmağa qoymamışam. Mən ailəmizin dağılmasını istəmirəm. Məhkəmə Ayselin boşanma iddiasını təmin edib, amma mən qərarın ləğvi üçün apellyasiya vermişəm. Bizim kitabımızda boşanmaq yoxdur. Ən əsası iki böyük övladımız var".

Lakin Elnurun dedikləri ekspert rəyi ilə təsdiqlənməyib. Məhkəmə hesab edib ki, o bu iddiaları cəzasını yüngülləşdirmək üçün irəli sürüb. Hakim həmçinin onun tez-tez "bizim kitabımızda boşanmaq yoxdur" ifadəsini işlətməsini də ittihamı gücləndirən hal kimi qiymətləndirib.

Hökmə əsasən, Elnur 2 il 8 ay azadlıqdan məhrum edilərək məhkəmə zalında həbs olunub. Apellyasiya məhkəməsi isə cəzanı 1 il 8 aya qədər azaldıb.

Milli.Az