TikTok-da öyrədənlər – Məlumatı marağa çevirən hesablar

Sürətlə inkişaf edən rəqəmsal dünyada informasiya əldə etməyin yolları da dəyişir. Artıq insanlar uzun məqalələr oxumaq yerinə, gündəlik məlumat ehtiyaclarını qısa və cəlbedici videolardan qarşılayırlar. Bu baxımdan TikTok təkcə əyləncə platforması kimi deyil, həm də maarifləndirici məzmunların yayıldığı bir məkan kimi çıxış edir. Burada elə yaradıcılar var ki, cəmi bir neçə saniyəyə həm düşündürür, həm də öyrədirlər.

Platformadakı tədris məzmunu kontekstində qeyd etmək lazımdır ki, TikTok video platformasının təşəbbüsü və Azərbaycan Respublikası Mədəniyyət Nazirliyinin dəstəyi ilə həyata keçirilən #TikTokdanÖyrən layihəsi böyük maraq doğurub. Layihə çərçivəsində ümumilikdə 21.400 maarifləndirici video paylaşılmışdır.
Burada biz belə üç TikTok yaradıcısını təqdim edirik - hər biri bilikləri qısa, aydın və yadda qalan formada çatdırır.

Faktlar sadə dildə, diqqətçəkən formada - @ariq.qerib

@ariq.qerib TikTok-da həm Azərbaycanın, həm də dünyanın müxtəlif ölkələri haqqında az tanınan, bəzən isə tamamilə bilinməyən faktları paylaşır. Onun videoları sadə dildə qurulsa da, çox vaxt izləyicini təəccübləndirməyi bacarır. Arif bir neçə cümlə ilə qısa zaman içində həm informativ, həm də maraqlı məzmun təqdim edir. Bu da onun kontentini təsadüfi skroll zamanı belə izləməyə dəyər edir. Onun ən çox izlənilən videolarından biri çoxlarının heç eşitmədiyi, amma olduqca təhlükəli olan bir balıq haqqındadır. Videoda bu balığın daş parçasına bənzədiyi üçün "daş balıq" adlandırıldığını izah edir. Üstəlik, balığın bədənindəki iynələrin son dərəcə zəhərli olduğunu qeyd edərək, izləyicilərə həm təəccüblü, həm də vacib bir məlumat çatdırır. Sürətli ritmdə yaşadığımız dünyada onun kimi yaradıcılar informasiyanı qısa, yaddaqalan və faydalı şəkildə çatdırmaq bacarığı ilə seçilirlər.

 "Bu doğrudurmu?" deyə düşündürən faktlar - @blackboxpro

@blackboxpro izləyicilərini daim təəccübləndirən yaradıcılardan biridir. Onun paylaşdığı faktlar çox vaxt insanı bir anlıq duruxmağa vadar edir. "Gözləyin, bu, həqiqətən də doğrudurmu?" - bu cür suallar onun videolarının ən təbii reaksiyasıdır. Qısa videolarında faktları sadə dillə izah edən yaradıcı, məlumatı həm maraqlı, həm də düşündürücü formada təqdim edir. Bu da onu sıradan məlumat səhifələrindən fərqləndirir. Onun ən çox izlənilən videolarından biri Braziliyada yerləşən İlan adası haqqındadır. Həmin videoda bu adanın son dərəcə təhlükəli olduğunu və ora heç kimin ayaq basmadığını deyir. Səbəbi isə adada dünyanın ən zəhərli ilanlarından biri - insanı cəmi bir neçə dəqiqəyə öldürə biləcək "qızılı ilan"ın yaşamasıdır. Onun məzmunu təəccüb və təhsil arasında mükəmməl balans yaradır.

Telefonların gizli dünyasına pəncərə - @telefonclub

@telefonclub texnologiyaya, xüsusən də mobil telefonlara marağı olan hər kəs üçün əsl kəşfdir. O, insanların gündəlik istifadə etdiyi telefonların bir çoxunun gizli və az bilinən funksiyalarını paylaşır. Bu videolar sayəsində bir çox istifadəçi telefonundan daha səmərəli istifadə etməyi öyrənir. O, sadəcə texniki məlumat vermir, həm də həmin xüsusiyyətlərin nə zaman və necə faydalı ola biləcəyini izah edir. Ən çox maraq doğuran videolarından biri isə TikTok-dan birbaşa telefona necə ekran animasiyası (wallpaper) qoymağın mümkün olduğunu göstərdiyi paylaşımdır. Sadə addımlarla izah etdiyi bu praktiki məlumat bir çox izləyicinin diqqətini cəlb edib və gündəlik istifadə üçün faydalı ipucu kimi yadda qalıb. Beləliklə, onun məzmunu təkcə maraqlı deyil, həm də olduqca funksionaldır.

TikTok əyləncə ilə yanaşı öyrənmək üçün də böyük bir platformadır. Haqqında danışdığımız yaradıcılar sübut edirlər ki, maarifləndirici məzmun da maraqlı və izlənilən ola bilər. Onların videoları bizi təəccübləndirir, düşündürür və gündəlik həyatımızda istifadə edə biləcəyimiz yeni məlumatlarla zənginləşdirir. Sadəcə ekranı sürüşdürərkən belə bir çox şey öyrənmək mümkündür - yetər ki, doğru yaradıcıya rast gələsən.

Milli.Az