Sağlamlıq

Çox arıq olmaq, artıq çəkidən daha təhlükəli imiş

20 Sentyabr 2025 00:39

Baxış: 255

VTB-də yüksək depozit faizleri daha çox qazandırır

#SAĞLAMLIQ

Yeni aparılan bir araşdırma göstərib ki, həddindən artıq arıq olmaq, artıq çəkili və ya yüngül dərəcədə kök olmaqdan daha ölümcül risk daşıyır. Alimlər bildirirlər ki, bəzi hallarda "kök amma formada olmaq" mümkündür.

Danimarkalı alimlərin 5 il ərzində 85 min 761 nəfər üzərində apardığı tədqiqatda iştirakçıların 8%-i dünyasını dəyişib.

Nəticələrə görə, artıq çəkili (BMI 25-30) və ya yüngül obez (BMI 30-35) şəxslərin ölüm riski, sağlam BMI aralığında (22.5-25) olan insanlarla müqayisədə daha yüksək deyil.

Əksinə, çox arıq (BMI 18.5 və altı) şəxslərdə ölüm riski 2,7 dəfə çox olub. Hətta sağlam aralığın aşağı sərhədində (BMI 18.5-20) olanlarda belə riskin ikiqat artdığı müşahidə olunub.

Mütəxəssislərə görə, bu nəticələr bəzən altda yatan xəstəliklərlə bağlı ola bilər. Yəni bədənin arıqlaması xəstəliyin təsiri ilə baş verirsə, ölüm riskini artıran əsas səbəb çəki yox, həmin xəstəlikdir.

Başqa bir araşdırma isə göstərib ki, arıq görünsələr də, bir çox insanda daxili orqanların ətrafında yığılan visseral yağlar mövcuddur. Bu yağlar ürək və damar sisteminin daha sürətli qocalmasına, hətta infarkt riskinin artmasına səbəb ola bilər.

Avropa Ürək Jurnalında dərc olunan nəticələrə görə, bədən forması, çəkidən daha vacibdir.

Qarın nahiyəsində yağ yığan "alma tipli" kişilərdə ürək yaşlanmasının daha sürətli olduğu müəyyən edilib.

Yan və bud nahiyəsində yağ saxlayan "armud tipli" qadınlarda isə ürəyin daha sağlam və gənc qaldığı müşahidə olunub.

Lalə Qüdrətova
Milli.Az