Etirazçılar parlament binasından uzaqlaşdırıldı - Yenilənib

00:10

Gürcüstanda mitinq iştirakçıları Rustaveli prospektinin parlament binasının yerləşdiyi hissəsindən uzaqlaşdırılıb.

Milli.Az APA-ya istinadən bildirir ki, xüsusi təyinatlılar aksiya iştirakçılarını Çiçinadze və Çitadze küçələrindən də çıxarıblar.

Mitinq iştirakçılarının bir hissəsi Aleksandrovi bağına, qalanı isə metronun Rustaveli stansiyası istiqamətinə hərəkət edib.

Parlamentin qarşısındakı əraziyə xüsusi təyinatlılar tam nəzarət edir.

Xüsusi təyinatlılar bir müddət əvvəl Azadlıq meydanından Rustaveli prospekti istiqamətində hərəkətə keçib.

---------
22:39

Daxili İşlər Nazirliyinin xüsusi təyinatlıları Tbilisidə etirazçıları parlament binasından uzaqlaşdırmağa başlayıb.

Milli.Az APA-ya istinadən bildirir ki, bu barədə gürcü mətbuatı məlumat yayıb.

Məlumata görə etirazçıları dağılışmağa səsləyən xəbərdarlıq sirenası səslənir. Xüsusi təyinatlılar Azadlıq meydanından Rustaveli prospekti istiqamətində hərəkətə keçib.

Hüquq-mühafizə orqanlarının əməkdaşları aksiya iştirakçılarına üç tərəfdən yaxınlaşaraq, onları yarımmühasirəyə alıblar. Polis aksiya iştirakçılarını dağıtmaq üçün gözyaşardıcı qaz və su şırnaqlarından da istifadə edir.
 

--------------
21:15

Gürcüstanın paytaxtı Tbilisidə kaçirilən son parlament seçkilərinin əleyhinə etiraz aksiyaları yenidən başlayıb.

Milli.Az APA-ya istinadən bildirir ki, ötən ayın 28-dən müxaliət tərəfindən başladılan aksiyalar bu gün də davam edir. Aksiyaçılar parlament binası yaxınlığında toplaşmağa başlayıblar.

Gürcüstan Daxili İşlər Nazirliyinin əməkdaşları aksiya iştirakçılarını dağıtmaq üçün gözyaşardıcı qazlardan istifadə etməyə başlayıblar.

Hazırda etirazçıların Parlament binasından uzaqlaşdığı və yalnız Rustaveli prospektində dayandıqları bildirilir.

Batumidə, Avropa Meydanında da etiraz aksiyasının yenidən başladığı bildirilir. Gənclər Gürcüstanın və Avropa İttifaqının bayraqlarını açıblar.

Aksiya iştirakçıları öz ölkələrinin Avropa gələcəyi üçün mübarizəni davam etdirəcəklərini bildiriblər.

Qorinin mərkəzində də etiraz aksiyası keçirilir. Bu dəqiqələrdə toplaşanlar şəhərin küçələri ilə yürüşə başlayıblar.

Milli.Az