İqtisadiyyat

2019-cu ildə "Cənub Qaz Dəhlizi" üzrə investisiya planları açıqlanıb

14 Fevral 2019 07:47
Baxış: 391

Azərbaycanın "Cənub Qaz Dəhlizi" Qapalı Səhmdar Cəmiyyəti 2019-cu ildə Dəhlizin müvafiq seqmentlərinə təqribən 900 milyon dollar investisiya yatırmağı planlaşdırır.

Milli.Az xəbər verir ki, bu barədə Trend-ə Azərbaycan Respublikası Dövlət Neft Şirkətindən (SOCAR) bildiriblər.

Şirkətdən deyiblər ki, bu vaxta qədər QSC "Cənub Qaz Dəhlizi" meqa layihəsinin seqmentlərinə 9,6 milyard ABŞ dolları (maliyyə öhdəliklərinə uyğun olaraq) həcmində investisiya qoyub.

Bununla belə, qeyd olunub ki, şirkətin sərmayələri təkcə ötən il təqribən 1 milyard dollar təşkil edib:

"QSC cari ildə "Cənub Qaz Dəhlizi"nin müvafiq seqmentlərinə 900 milyon dollara yaxın investisiya yatırmağı planlaşdırır".

Qeyd edək ki, 2018-ci il mayın 29-da Bakıda "Cənub Qaz Dəhlizi"nin birinci mərhələsinin rəsmi açılış mərasimi keçirilib. İyunun 12-də isə Türkiyənin Əskişəhər şəhərində TANAP qaz kəmərinin istifadəyə verilməsi münasibətilə təntənəli mərasim baş tutub.

"Cənub Qaz Dəhlizi"nə "Şahdəniz-2" qaz yatağı, Cənubi Qafqaz Boru Kəməri, TANAP və TAP layihələri daxildir. 1,2 trilyon təbii qaz ehtiyatına malik "Şahdəniz" Azərbaycanın ən iri qaz-kondensat yatağı və "Cənub Qaz Dəhlizi"nin hasilat mənbəyidir.

Milli.Az

loading...

XƏBƏR LENTİ

Copyright © 2015 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.