“Qiymətli metal” 11 ayda 28% bahalaşıb

Milli.Az xəbər portalı bildirir ki, dünya birjalarında qızılın qiyməti bahalaşıb. Nyu-Yorkun "Comex" elektron satış birjasıda qızılın dekabr ayına olan fyuçerslərinin qiyməti 0,4% bahalaşaraq 1363,6 dollara təklif edilib. Ekspertlər hesab edir ki, ümumilikdə bazar iştirakçıları qızılın qiymətinin qalxmasında maraqlıdır. Bildirirlər ki, Koreyadan gələn xəbərlər metalın qiymətinin bahalaşmasında mühüm rol oynayıb. Yəni Cənubi Koreya ilə Şimali Koreya arasında atışma fond birjalarına təsirsiz ötüşməyib.

"National Australia Bank Ltd"nin analitiki Ben Bestmor isə deyib ki, növbəti ilin ilk rübündə qızılın unsiyası orta hesabla 1375 dollara çata bilər. Qeyd edək ki, 2010-cu ilin əvvəlindən qızılın qiyməti 28% bahalaşıb.
İqtisadçı-ekspert Vüqar Bayramovun sözlərinə görə, qızılın qiymətindəki artıma investorların öz vəsaitlərini qızılla saxlamaq niyyətləri təsir edir: "Qızılın qıymətinin artması yalnız valyuta bazarında baş verən dəyişikliklərlə bağlı deyil.  Nəzərə alsaq ki, dolların məzənnəsinin yaxın aylarda daha da aşağı düşəcəyi, ilin sonuna qədər avronun məzənnəsinin ötən ilki məzənnə səviyyəyə qədər yüksələcəyi yönündə  proqnozlar var, hansıki bütün bunlar  valyuta bazarına təsir edib".

V.Bayramov qeyd edir ki, "qiymətli metal" böhran dövründə ən etibarlı yığım vasitəsi hesab olunur. Yəni likvid qiymətli material kimi  böhran dövründə qızıla tələbat artır: "Amerika iqtisadiyyatında proqnozlaşdırılan, amma müşahidə edilməyən artım templəri, eləcə də işsizlik səviyyəsinin artması  investorları vəsaitlərinin bir və yaxud əsaslı qismini qızılın alınmasına  yönəltməsinə gətirib çıxarıb. İnvestorlar öz vəsaitlərini  səhmlərdən çəkərək qızılda saxlamağa üstünlük verirlər.Yaxın aylarda qızılın qiymətində artımlar davam edəcək. Bu eyni zamanda dolların avroya və digər valyutalara nisbətən nisbətən məzənnəsinin aşağı düşməsi ilə müşahidə ediləcək. Güman edilir ki, dolların məzənnəsinin aşağı düşməsi ilə paralel Mərkəzi Bank manatın dollara nisbətən müəyyən qədər möhkəmlənməsini həyata keçirsin.  Çünki dolların məzənnəsi aşağı düşdükcə manatın dollara nisbətən məzənnəsində də dəyişikliklər olacaq". 

Mütəxəssisin fikrincə,  dolların məzənnəsinin aşağı düşməsi eləcə də ilin sonuna qədər dünya iqtisadiyyatında ciddi inkişaf meyillərinin müşahidə edilməyəcəyinə dair proqnozlar qızıla tələbatı artıracaq. İnvestorların qızıla vəsait yönəltməsi "qiymətli metal"ın bahalaşmasını  şərtləndirəcək. İlin sonuna qədər qızılın dünya bazar qiymətində daha 7 faiz artım gözlənilir.

Milli.Az