İqtisadiyyat

Azərbaycan nefti 109 dolları keçdi

24 İyul 2026 09:41

Baxış: 267

VTB-də minimal faiz dərəcəsi ilə nağd kredit 9.9%-dən

Dünya bazarında neft qiymətləri kəskin bahalaşıb.

Milli.Az-ın neft bazarındakı mənbəyə istinadən verdiyi məlumata görə, İtaliyanın Auqusta limanında "Azeri Light" markalı Azərbaycan neftinin CIF bazasında bir barelinin qiyməti əvvəlki göstərici ilə müqayisədə 8,54 ABŞ dolları (8,49%) artaraq 109,10 ABŞ dollarına yüksəlib.

Türkiyənin Ceyhan limanında "Azeri Light" neftinin FOB bazasında qiyməti isə 8,49 ABŞ dolları (8,78%) bahalaşaraq bir barel üçün 105,18 ABŞ dolları təşkil edib.

"URALS" markalı xam neftin qiyməti 7,96 ABŞ dolları (12,65%) artaraq 70,90 ABŞ dollarına, Şimal dənizindən hasil olunan "Dated Brent" markalı neftin qiyməti isə 10,75 ABŞ dolları (11,42%) yüksələrək 104,92 ABŞ dollarına çatıb.

Qeyd edək ki, Azərbaycanın 2026-cı il dövlət büdcəsində neftin bir bareli üzrə baza qiyməti 65 ABŞ dolları səviyyəsində nəzərdə tutulub.

"Trading Economics"in məlumatına əsasən, dünya bazarında xam neftin qiyməti 92 ABŞ dollarından yuxarı ticarət olunur və Yaxın Şərqdə artan hərbi gərginlik səbəbindən həftəlik bahalaşma 12 faizi ötüb.

Buna əsas səbəb ABŞ ilə İran arasında davam edən qarşıdurma, Qırmızı dənizdə neft tankerlərinə hücumlar, Hörmüz boğazı ətrafında təhlükəsizlik risklərinin artması və Xəzər Boru Kəməri Konsorsiumunun (CPC) Qara dəniz terminalında neft yükləməsini dayandırması göstərilir. Bu amillər qlobal neft tədarükü ilə bağlı narahatlıqları daha da gücləndirib.

Müəllif: Malik Məlikov (Milli.Az redaktor)