İqtisadiyyat

Orta Dəhliz artıq Şərqlə Qərb arasında tranzitdə əsas rollardan birini oynayır - Özbəkistanın nəqliyyat naziri

24 May 2024 17:10
Baxış: 542
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Orta Dəhliz artıq Şərqlə Qərb arasında tranzitdə əsas rollardan birini oynayır.

Milli.Az xəbər verir ki, bu barədə Trend-ə özəl müsahibəsində Özbəkistanın nəqliyyat naziri İlhom Maxkamov deyib.

"Orta Dəhliz artıq bu gün Şərqlə Qərbi arasındakı əsas nəqliyyat marşrutlarından biri kimi özünü göstərir. Bu dəhlizin inkişafında Azərbaycan, Qazaxıstan və Türkmənistandan olan həmkarlarımızla daha fəal əməkdaşlıq etmək niyyətindəyik", - İ.Maxkamov Beynəlxalq Nəqliyyat Forumunun (ITF) Almaniyanın Leypsiq şəhərində keçirilən sammitinin kuluarlarında deyib

Onun sözlərinə görə, Özbəkistan öz ixrac və idxalı üçün marşrutların şaxələndirilməsində maraqlıdır və hətta buna məcburdur.

"Biz tranzit axını artıraq, eyni zamanda yükdaşıma marşrutlarını şaxələndirməyə, idxal və ixrac etdiyimiz mallar üçün yeni dəhlizlər tapmağa sadəcə məcburuq. Səbəb geosiyasi vəziyyətdir, axı bütün logistika zənciri dəyişib", - deyə nazir əlavə edib.

Nazir qeyd edib ki, Orta Dəhlizin iştirakçı ölkələrinin ilk növbədə tarif və infrastruktur olmaqla, hələ görməli olduğu işlər var.

"Bu gün Orta Dəhliz üzrə tariflər Şimal və Cənub marşrutları ilə müqayisədə bir o qədər də rəqabət qabiliyyətli deyil. Razılaşdırdığımız güzəşt necə deyərlər, digər dəhlizlərlə müqayisədə dəmir yolu ilə yük daşımaları ilə bağlı vəziyyəti tənzimləyir", - o deyib.

Nazir vurğulayıb ki, söhbət tariflərə 50 faiz güzəştdən gedir.

"Bu marşrutun keçdiyi ölkələrin dəmir yolu administrasiyaları beştərəfli formatda tarif preferensiyaları razılaşdırıb. Düşünürəm ki, bu dəhlizlə yük daşımalarının həcmini artırmağa kömək edəcək", - deyə o əlavə edib.

"Əlbəttə, hələ həll edilməli infrastruktur məsələləri var. Dəhlizin tıxaclar yaranan bəzi sahələri genişləndirilməlidir. Lakin Qazaxıstan və Türkmənistandan, eləcə də Azərbaycan və Gürcüstandan olan həmkarlarımızın mövcud məsələlərin həlli üzərində necə işlədiklərini görürük və bu, Orta Dəhlizin əsas tranzit marşrutlarından biri olacağına dair əminlik yaradır", - deyə nazir sonda bildirib.

Qeyd edək ki, 22-24 may tarixlərində Almaniyanın Leypsiq şəhərində Litvanın sədrliyi ilə Beynəlxalq Nəqliyyat Forumunun (ITF) dayanıqlı iqtisadiyyata imkan yaradan nəqliyyat üzrə sammiti keçirilir. İştirakçılar nəqliyyatın eyni zamanda ekoloji və sosial dayanıqlılığa səbəb olmaqla, necə iqtisadi artıma imkan yarada biləcəyi haqqında müzakirələr və fikir mübadiləsi aparır.

Beynəlxalq Nəqliyyat Forumu (ITF) 60-dan çox ölkənin, o cümlədən Azərbaycanın da iştirak etdiyi hökumətlərarası təşkilatdır.

ITF 2006-cı ildə İqtisadi Əməkdaşlıq və İnkişaf Təşkilatının (İƏİT) yanında 1953-cü ildən etibarən fəaliyyət göstərən Avropa Nəqliyyat Nazirləri Konfransının (ECMT) varisi kimi təsis edilib.

Milli.Az
Xəbərlərimizi WhatsApp kanalımızdan da oxuyun

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.