Mədəniyyət

Belə Səttarımız yox idi

30 Aprel 2015 18:38
0 Şərh     Baxış: 2 183
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən
Xalq rəssamı Səttar Bəhlulzadənin obrazı, Səttar şəxsiyyəti bir çox rəssam və heykəltəraşları, şairləri cəlb edib. Fuad Əbdürrəhmanov, Ömər Eldarov, Elmira Şahtaxtinskaya, Tağı Tağıyev, Toğrul Nərimanbəyov, Vasili Necitaylo və başqa görkəmli sənətkarlar böyük rəssamın şəxsiyyətinə və sənətinə olan sevgi və ehtiramın nümunəsi kimi onun portretlərini yaradıblar.

Milli.Az xəbər verir ki, Mədəniyyət və Turizm Nazirliyindən Trend-ə verilən məlumata görə, S.Bəhlulzadənin ev-muzeyinin baş mühafizi, sənətşünaslıq üzrə fəlsəfə doktoru, rəssamın ailə üzvü Pərzad Abdinovanın apardığı araşdırmalar nəticəsində Özbəkistanda S.Bəhlulzadənin daha bir portreti aşkarlanıb. Rəssamın çoxsaylı portretlərindən birinin müəllifi Özbəkistan və Tatarıstanın xalq rəssamı, SSRİ Dövlət mükafatı laureatı Çingiz Əhmərovdur.

S.Bəhlulzadənin ev-muzeyindən bildirilib ki, 1979-cu ildə yaradılmış "Azərbaycanın xalq rəssamı Səttar Bəhlulzadənin portreti" adlı rəsm əsəri (75 x 85 sm) hazırda Özbəkistan Bədii Akademiyasında saxlanılır.

Ç.Əhmərovun S.Bəhlulzadə ilə tanışlığı V.İ.Surikov adına Moskva Dövlət Rəssamlıq İnstitutunda təhsil aldığı illərə təsadüf edir.

Aşkar edilən rəsm əsəri Ç.Əhmərovun çəkdiyi S.Bəhlulzadənin ikinci portretidir. Belə ki, əvvəllər məlum olan "Səttar Bəhlulzadə" portretində Ç.Əhmərov azərbaycanlı rəssamın profilini təsvir edib, bu zaman rəssamın əlləri və barmaqlarını önə çəkib.

Mavi tonlarda işlənmiş "Azərbaycanın xalq rəssamı Səttar Bəhlulzadənin portreti" fərqli tərzdə icra olunub. Burada S.Bəhlulzadə gənclik illərində təsvir edilib. Portretdə diqqəti ilk cəlb edən Səttarın ifadəli iri gözləridir. Xəyala dalmış nəzərləri, oturuşu gənc rəssamın romantikliyindən, başının dikliyi, dodaqları isə xarakterinin mətinliyindən xəbər verir.

Qeyd edək ki, S.Bəhlulzadənin ev-muzeyi tərəfindən "Azərbaycanın xalq rəssamı Səttar Bəhlulzadənin portreti" adlı rəsm əsərinin kətan üzərində olan eyni ölçülü surəti hazırlanıb.

Milli.Az
Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.