Zarina Qurbanova: "Ziyadan aldığım enerjini heç bir tərəf-müqabilimdən almamışam" - VİDEO - FOTO

Aktrisa Zarina Qurbanovanın müsahibəsi.

- Zarina, necə oldu ki, bu filmə dəvət aldın?

- Filmin rejissoru Ramil Ağasıyev kastinqə dəvət etdi. Növbəti gün görüşə gəldim. Şəkil, videoyoxlanış - və deyəsən, xoşlarına gəldim.
 

- Ssenarini oxuyanda oynayacağın rol səndə hansı təəssüratı oyatdı?

- İlk dəfə ssenarini oxuyanda dondum. Söhbət xərçəng xəstələrinin həyatından gedirdi, bu isə mənə xərçəng xəstəliyi səbəbindən həyatını itirmiş doğmalarımı xatırlatdı. Yenə də oxudum. Hadisələr gözlərimin önündə canlandı. İçimdən bir hiss keçdi: nə, necə - bilmirəm, amma mən bu işə ürəyimi qoyacam. Bu düşüncə, bu hisslərlə hər şey başlandı.
 

- Çəkiliş prosesində heç rejissorla aranızda hər hansı bir fikir ayrılığı oldumu?

- Ramil bəylə hazırlıq dövründə anlaşmadığımız məsələlər oldu. Mən başqa şey hiss edirdim, o başqa şey görürdü. Tam səmimi deyim ki, bu filmə qədər harada oynamışamsa rejissor "əla, bravo, keçək növbəti səhnəyə" deyirdi. Burada isə tam tərsinə oldu. Necə deyərlər, Ramil Arzunu yaratmaq üçün Zarinanı xəmir kimi "yoğurdu". Məşqlərdən sonra ortaq məxrəcə gələ bildik. Sağ olsunlar, Vaqif Əsədovla Rasim Cəfər də mənə kömək oldular.
 

- Filmdəki tərəf-müqabilin ürəyincə idimi?

- İlk tanış olduğumuz gün yadımdadır. Prodüserimiz Ziyanı göstərib dedi ki, "Necədir, xoşuna gəlir?" Cavabında: "Xarizmatikdir, amma zövqümdə deyil", - dedim. Aktyor olmadığını bilirdim, amma açığını deyim ki, bu günə qədər oynadığım tərəf-müqabillərimin heç birindən Ziyadan aldığım enerjini almamışdım. Ən vacib olan da budur - qarşındakı partnyoru hiss edib enerji alasan.
 

- Filmdəki qəhrəmanla eşq yaşayırsınız. Maraqlıdır, həyatda münasibətləriniz necədir, hələ ona aşiq olmamısan ki?

- Yox, Ziya mənim üçün xətrini çox istədiyim, hörmət elədiyim biridir sadəcə. Çox yaxşı dostuq hazırda.
 

- Filmdəki öpüş səhnəsi ilə bağlı nə deyə bilərsən?

- Bir söz deyim ki, film həyatda olanların əksidir. Mən aktrisayam və həyatda normal olan hissləri, yaşantıları tamaşaçıya olduğu kimi çatdırmalıyam.
 

- Çəkilişlər ən çox hansı hadisələrlə yadda qaldı? Heç ekstrim vəziyyətlər oldumu?

- Paraşütlə tullandığımız səhnədə olan həyəcanı yaşamamışdım indiyə qədər. Deməli, çəkim az olduğundan külək məni düşündüyümüz çəkiliş məkanına yox, başqa kəndə apardı. Bir də eşitdim ki, aşağıdan hamı niyəsə qışqırır. Aşağı baxanda gördüm ki, kəndin ümumi elektrik blokunun üstünə uçuram. Həmin anda nə yaşadım - bir allah bilir. Gözlərimi yumub bərkdən gülməyə başladım, çünki son dəqiqələrim idi. Düz enerji blokunun üstünə düşdüm, kənd camaatının səsi hələ də qulağımdadır. Nə yaxşı ki, elektrik kəsilmişdi. Ayağım bərk əzilmişdi. Amma gözümə bu görünmürdü, təki filmimiz alınaydı.
 

- Səncə, izləyicilər tərəfindən bu film seviləcəkmi?

- Nə olacağını, tamaşaçıların necə qarşılayacağını bilmirəm. Bildiyim bir şey var ki, biz komanda olaraq bir-birimizə inandıq. Hər birimiz bu filmə ürək qoyduq. Çalışdıq ki, "Arzuların ardınca" kimin üçünsə mübarizə olsun, bir başqası üçün arzularına inam olsun, həyat eşqi ilə yaşamaq olsun.

Mill.Az
 
Böyütmək üçün şəkillərə klikləyin.

Videonu izləmək üçün şəklə klikləyin.