“Təsviri Sənət Kağızda” adlı yaradıcılıq sərgisinə əsərlərin qəbulu elan edilib

Azərbaycanda klassik təsviri sənət ənənələrinin yaşadılması və rəssamların yaradıcılıq baxışının kağız üzərində ifadəsini geniş ictimaiyyətə təqdim etmək məqsədilə "Təsviri Sənət Kağızda" adlı yaradıcılıq sərgisinə müraciətlərin qəbulu başlayıb. Sərgi həm də kağız üzərində işlənmiş əsərlərə marağın artırılmasını hədəfləyir.

Sərgi Azərbaycan Rəssamlar İttifaqı, Azərbaycan Dövlət Rəsm Qalereyası, Xətai Beynəlxalq Akvarel Qalereyası və Xətai Sənət Mərkəzinin təşkilatçılığı ilə həyata keçirilir. Layihəyə Azərbaycan Respublikası Mədəniyyət Nazirliyi, Azərbaycan Televiziya və Radio Verilişləri QSC, Azərbaycan Mədəniyyət və İncəsənət Universiteti, Azərbaycan Dövlət Rəssamlıq Akademiyası, Xətai rayon İcra Hakimiyyəti, Beynəlxalq Sulu Boya Cəmiyyəti Azərbaycan nümayəndəliyi və Naxçıvan Muxtar Respublikası Rəssamlar Birliyi dəstək verir.

Sərgiyə kağız üzərində işlənmiş qrafika, miniatür, sulu boya və eskizlər təqdim oluna bilər. İştirak üçün son müraciət tarixi - 5 mart 2026-cı il. Əsərlər [email protected] elektron ünvanına göndərilə bilər.

İştirakçı anketi aşağıdakı məlumatları əhatə etməlidir:
    • Əsərin fotosu
    • Əsərin adı
    • Ölçü və texnika
    • Təvəllüd
    • Əlaqə məlumatı
    • Soyad, ad

Tələb olunan ölçü maksimum 35x55 sm-dir. Mövzu sərbəstdir. Yaş həddi - 18 yaşdan yuxarı. Hər iştirakçı ən çox 3 əsər təqdim edə bilər. Seçilmiş 100 əsər sərgilənəcək və sərginin online kataloqu hazırlanacaq. Sərgilənən əsərlər müəlliflərə geri qaytarılacaq.
Sərgi çərçivəsində müxtəlif nominasiyalar üzrə mükafatlar təqdim olunacaq:
    • Ən yaxşı milli ruhlu əsər
    • Ən yaxşı klassik əsər
    • Ən yaxşı miniatür
    • Ən yaxşı eskiz
    • Ən yaxşı qrafika
    • Ən yaxşı akvarel
    • Ən yaxşı ilüstrasiya
    • Ən yaxşı müasir əsər

Sərgidə əsəri nümayiş olunan iştirakçılara sertifikat təqdim ediləcək.

Yaradıcı insanlardan incəsənət təəssübkeşliyi görmək arzusu ilə!

İnformasiya dəstəyi - Trend.Az, Day.Az, Milli.Az, Azernews.Az