Xəzər rayonunda maşın qarətçisi, Sumqayıtda isə velosiped oğrusu tutuldu

Polis əməkdaşlarının keçirdikləri əməliyyat-axtarış tədbirləri nəticəsində Xəzər rayonu və Sumqayıt şəhərində silsilə oğurluq əməllərində şübhəli bilinən şəxslər müəyyən edilərək saxlanılıblar.

Milli.Az xəbər verir ki, Xəzər rayonunun Binə qəsəbəsində 6 avtomobildən pul və digər qiymətli əşyaların oğurlanması faktı üzrə aparılan araşdırmalar zamanı əvvəllər məhkum olunmuş E.Rəhimov şübhəli şəxs qismində saxlanılıb.

Bundan başqa, Sumqayıt şəhərində bir neçə velosiped oğurluğunda şübhəli bilinən, əvvəllər məhkum olunmuş 39 yaşlı C.Quliyev də polis əməkdaşları tərəfindən tutulub.

Məlumata görə, saxlanılan şəxsin üzərinə baxış keçirilən zaman ondan narkotik vasitə olan heroin də aşkarlanaraq götürülüb.

Faktlarla bağlı araşdırmalar davam etdirilir.

Müəllif: Malik Məlikov (Milli.Az redaktor)