Rəis müavini təyin edəcəyəm deyib 40 min manatını aldı

Bakıda dələduzluqlar edən şəxsə hökm oxunub.

Milli.Az-ın məlumatına görə, 40 yaşlı Astara rayon sakini Alim Səfərov (soyad şərtidir) üç nəfəri aldadaraq, külli miqdarda vəsaiti ələ keçirib.

İlk zərərçəkən 2012-2023-cü illərdə Xəzər rayonu 20 nömrəli xüsusi əyani-qiyabi orta məktəbinin direktoru işləmiş Şahin Musayevdir (soyad şərtidir). 2022-ci ildə həmin məktəbdə yoxlama aparılarkən nöqsanlar aşkarlanıb və Şahin Musayev barəsində Cinayət Məcəlləsinin 3 maddəsilə cinayət işi açılıb. Söhbət zamanı Alim özünü geniş əlaqələri olan şəxs kimi təqdim edərək, ona açılan cinayət işində dəyən ziyanı azaldacağını, habelə həmin ittihamlar üzrə Bakı Ağır Cinayətlər Məhkəməsinə göndərilən işə xitam veriləcəyini vəd verib. Bu məqsədlə ondan 3 min manat pul alıb.

İkinci epizodda da zərərçəkən tərəf Nizami rayonu ərazisində yerləşən 2 saylı xüsusi əyani-qiyabi orta məktəbin 2014-2022-ci illərdə direktoru olmuş Əmrah Səfərov olub. Onun rəhbəri olduğu məktəbdə 2022-ci ildə aparılan yoxlamalar zamanı nöqsanlar üzə çıxıb və direktor barəsində Cinayət Məcəlləsinin 3 maddəsilə cinayət işi açılıb. Alim Səfərov Əmrah Səfərova da cinayət işinə xitam veriləcəyini söz verib və ondan 10 min manat pul alıb.

Üçüncü zərərçəkən isə hüquq-mühafizə orqanlarının Bəhruz adlı əməkdaşıdır. O, Lənkəranda bir restoranda söhbət zamanı Alimlə tanış olub. Alim ona Astara kəndlərindən birinin məscidində axund vəzifəsində işlədiyini və çox geniş əlaqələri olduğunu deyib. Ona inanan Bəhruz Baş Dövlət Yol Polisi İdarəsinin Lənkəran şəhər Qeydiyyat və İmtahan Texniki Baxış Şöbəsinin rəis müavini işləmək istədiyini bildirib. Alim bu işdə ona kömək olacağını vəd verərək, ondan 200 min manat istəyib. İlk olaraq isə 23500 dollar (40 min manat) pul alıb və Bəhruza 1 ay ərzində vəzifəyə təyin olunacağı barədə əmr veriləcəyini bildirib.

Lakin təbii ki, vədlərin heç biri yerinə yetməyib və zərərçəkənlər polisə şikayət ediblər. Nəticədə Alim Səfərov saxlanılıb və barəsində yekun olaraq, Cinayət Məcəlləsinin 178.2.2-ci (dələduzluq, təkrar törədildikdə) və 178.2.4-cü (xeyli miqdarda törədildikdə) maddələri ittiham elan olunub.

Səbail rayon Məhkəməsində hakim Şəhla Süleymanovanın sədrliyi ilə keçirilən prosesdə Alim Səfərov barəsində 3 il 6 ay müddətinə azadlıqdan məhrumetmə cəzası təyin edilib. O, ümumi rejimli həbsxanada cəza çəkəcək./lent.az

Milli.Az