Ölkə

QHT-lərə Dövlət Dəstəyi Agentliyi iclas keçirdi

12 İyun 2021 15:28

Baxış: 603

İyunun 11-i Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının növbəti iclası keçirildi.

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyindən Milli.Az-a verilən məlumata görə, Müşahidə Şurasının iclasında Agentliyin fəaliyyətinin qurulması prosesində vətəndaş cəmiyyəti təmsilçilərinin iştirakını təmin etmək məqsədi ilə yaxın zamanlarda QHT nümayəndələri və ekspertlərlə görüşlərin keçirilməsi razılaşdırıldı. Eyni zamanda, Agentliyin Müşahidə Şurası üzvlərinin əlaqələndirdiyi sahələr üzrə QHT təmsilçiləri ilə məsləhətləşmələrin aparılması barədə təkliflər müzakirə olundu, onlarla görüşlərin keçirilməsi prosesinə başlanması qərara alındı.

İclasda mərkəzi və yerli icra hakimiyyəti orqanları yanında yaradılan ictimai şuralarla bağlı vəziyyət müzakirə olundu, bu sahədə problemin öyrənilməsi və tövsiyyələrin hazırlanması üzrə işçi qrup formalaşdırıldı.

Daha sonra ləğv olunmuş Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının ötən dövrdən qalmış öhdəlikləri barədə məsələ müzakirə olundu. Qərara alındı ki, Agentliyin strukturu müəyyən olunduqdan sonra Şuranın öhdəlikləri barədə arayış hazırlanaraq Müşahidə Şurasının növbəti iclasında yenidən müzakirəyə çıxarılsın.

Sonda Agentliyin əməkdaşlarının işə götürülməsi ilə bağlı komissiya formalaşdırıldı və bu istiqamətdə müvafiq işlərə başlanılması qərara alındı.

Milli.Az