Ölkə

"Azərbaycanda yoluxma sayı təhlükəli həddə çata bilər" - FOTO

30 Oktyabr 2020 14:18
Baxış: 2 274

Artıq 7 aydır ki, COVİD 19 infeksiyasına yoluxmuş xəstələrin psixiatrik durumu tərəfimdən qiymətləndirilir.

Bunu Milli.Az-a açıqlamasında 1 saylı Kliniki Tibbi Mərkəzin ("Semaşko") COVİD-19 infekiyasi üzrə konsultant psixiatrı Aytən Namazova deyib. 

O bildirib ki, COVİD 19 infeksiyasının sürətlə yayılmasının qarşısını almaq məqsədi ilə maksimal dərəcədə tətbiq edilmiş karantin qaydalarına əməl etməliyik:

"Bu günlərdə Vətənimiz hər iki düşmənlə qətiyyətli şəkildə eyni arada mübarizə aparır. Əsgərlərimiz ön cəbhədə öz torpaqlarımızın işğaldan azad edilməsi uğrunda Vətənimizin müdafiəsində, həkimlərimizin isə hər iki cəbhədə göstərdikləri fədakarlıqlar danılmazdır. Ön cəbhədə qəhrəmancasına şəhid olan hərbiçilərimizi, əsgərlərimizi və eyni zamanda hər iki cəbhədə şəhid olan həkimlərimizi böyük hörmət və qürur hissi ilə anırıq. Hazırda bildiyimiz kimi son günlər Vətənimizdə COVİD 19 infeksiyasına yoluxanların sayı durmadan artır. Yoluxma sayı sürətlə irəliləyib, təhlükəli həddə çata bilər. Bu dönəmdə ordumuzun, əsgərlərimizin, əhalimizin sağlamlığını və əhval-ruhiyyəsini nəzərə alaraq COVİD 19 infeksiyasının sürətlə yayılmasının qarşısını almaq məqsədi ilə maksimal dərəcədə tətbiq edilmiş karantin qaydalarına əməl etməli, tibbi maskalardan mütləq şəkildə istifadə etməli və sosial məsafə qorunmalıdır".

Psixiatr bildirib ki, COVİD 19-a yoluxmuş xəstələrin konsultasiyası zamanı ilk dönəmlərdən fərqli olaraq psixoloji pozuntulara nisbətən az rast gəlinir:

"COVİD 19 pandemiyasının ilk dönəmlərində koronavirusa yoluxmuş xəstələrin konsultasiyası zamanı psixoloji durumunda qorxu, həyəcan, təşviş, yuxu pozuntuları və depressiv hallar daha çox müşahidə edilirdi. Hal-hazırda bu kimi psixoloji pozuntulara nisbətən az rast gəlinir. Səbəb isə, təbii ki, əhalimizin pandemiyanın ilk vaxtları ilə müqayisədə daha çox təlimli və ehtiyatlı davranmalarıdır. Onu da qeyd edim ki, konsultasiya zamanı müşahidə etdiyim ən maraqlı məqamlardan biri müharibə dövründə Vətənimizin işğaldan azad olunmuş torpaqlarının sevinc xəbərini eşitdikcə xəstələrdə ruh yüksəkliyi daha da artır və xəstəliklərinə qarşı psixoloji immunitetləri, sanki, möhkəmlənmiş olur".

Təhməz Əsədov
Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.