Ölkə

Psixoloq-konsultant: "Qorxmağı dayandırın və özünüzü, yaxınlarınızı sakitləşdirin"

27 Mart 2020 14:10
1 Şərh     Baxış: 927

Azərbaycanda koronavirusla bağlı vəziyyətə nəzarət edilir, ölkəmizdə ona qarşı mübarizə aparmaq üçün kifayət qədər xəstəxana, həkim və avadanlıq var. Ona görə də insanların təlaşa düşməsinə lüzum yoxdur.

Milli.Az xəbər verir ki, bunu Trend-ə psixoloq-konsultant Mehriban Məmmədkərimova deyib.

Onun sözlərinə görə, buna baxmayaraq, insanlar ehtiyat tədbirlərinə riayət etməlidirlər.

Koronavirusun o qədər də təhlükəli olmadığını, ona əsasən, immuniteti zəif, xroniki xəstəliyi olan insanların, yaşlıların yoluxduğunu xüsusi vurğulayan psixoloq-konsultant yalnız bəzi xəstələrdə fəsadlaşma hallarının müşahidə edildiyini, insanların çoxunun koronavirusdan sağaldığını söyləyib:

"Ancaq bəzi insanlar özlərini o qədər qorxudurlar ki, hətta nəfəs almağa belə risk etmirlər. Nəzərə alın ki, bütün qorxularınız gələcəkdə sizin, eləcə də övladlarınızın sağlamlığında müəyyən fəsadlar yarada bilər. Qorxmağı dayandırın və özünüzü, yaxınlarınızı sakitləşdirin. Tezliklə bu sınaqlar arxada qalacaq! Əgər biz vəziyyəti dəyişə bilmiriksə, onda hadisələrə olan münasibətimizi dəyişməliyik. Epidemiyaya görə yaranmış çətin vəziyyət hər kəsi məyus edir. Lakin biz pozitivə köklənməliyik".

M.Məmmədkərimova hesab edir ki, karantin tədbirləri insanların maddi vəziyyətini pisləşdirsə də, onun müsbət tərəfləri də var. İnsanlar indi doyunca yatmaq, istirahət etmək, doğmaları ilə vaxt keçirmək, uşaqları ilə oynamaq, kitab oxumaq, maraqlı filmlərə baxmaq və s. üçün kifayət qədər vaxt qazanıb.

Psixoloq Bakıda hazırda karantinə görə yaranmış vəziyyəti 40-50 il əvvəlki vəziyyətə də oxşadıb:

"Bakıda bugünkü vəziyyət Sovet İttifaqındakı həyatı xatırladır. 40-50 il əvvəl Bakıda ticarət mərkəzləri yox idi, küçələrdə, metro və avtobuslarda insanların sayı belə çox deyildi, bu qədər çox restoran və kafe yox idi. İnsanlar asudə vaxtlarında kitab oxumaqdan və televizora baxmaqdan həzz alırdılar. Biz indi karantin şəraitində 40-50 il əvvəlki dövrü yaşayırıq. İndi bizim sərəncamımızda əlavə olaraq, həm də internet var. Biz indi karantinin olmasına baxmayaraq, bütün dünya ilə ünsiyyət saxlamaq imkanına malikik. 30 il əvvəl bizdə belə imkan yox idi. Bunlar isə onu göstərir ki, əslində, vəziyyət o qədər də pis deyil".

Milli.Az

loading...

Şərh yaz:

1 Şərh:

  • Anonim
    Joker · 27 Mart 14:2310

    Hələ qaz,su,işıq, internet varsa,marketlər,apteklər işləyirsə, küçədən az da olsa maşın səsi,insan hənirtisi gəlirsə,məncə də vəziyyət o qədər pis deyil )Bunlar olmasa (Allah göstərməsin) o zaman qorxmağa başlayacam.

    Cavab yaz

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.