Tanınmış britaniyalı jurnalist - Azərbaycan artıq Formula 1-in top 5-liyində özünə yer edib

"Azərbaycanın fantastik trası var. Bakıdakı tras ən həyəcanvericilərdən biridir. Burada həm yüksək sürət, həm də çətin döngələr var. Bakıdakı trasın imkanları, özəllikləri, fərqli cəhətləri, gözəlikləri çoxdur. Yəni əminliklə deyə bilərik ki, Azərbaycan artıq Formula 1-in top 5-liyində özünə yer edib. Artıq Bakıda Qran Prilər ən maraqlı yarışlardan olur. Onu da deyə bilərəm ki, Azərbaycan bu səviyyəyə çox tez gəlib çatıb".

Bu barədə Milli.Az-a açıqlamasında Böyük Britaniyanın məşhur "İndependent" qəzetinin müxbiri, avtoidman yarışlarından yazan tanınmış veteran jurnalist, "GrandPrix+" jurnalının tərəfdaş-təsisçilərindən və Formula 1 üzrə nüfuzlu ekspertlərdən biri Devid Tremeyn (David Tremayne) bildirib.

2018 Formula 1 Azərbaycan Qran Prisi mövsümün ən yaxşı yarışlarından biri seçilib

Onun sözlərinə görə, Azərbaycandakı yarışı çox bəyənsə də, müqayisədə bu ilin ən yaxşı Qran Prisi Meksikadakı yarış olub: "Məncə bu il orada ötmələr, hadisələr nisbətən daha həyəcanlı idi. Meksikada hər dəfə yarış maraqlı keçir. Orda gözəl tras var. Ona görə də düşünürəm ki, Meksika Qran Prisi ən populyar yarışlardandır. Hesab edirəm ki, Formula 1-də yarışların maraqlılığı baxımından Meksika Azərbaycana ən ciddi rəqibdir".

Britaniyalı jurnalist hesab edir ki, 2018-ci ildəki mövsüm əvvəlkilərlə müqayisədə Formula 1 tarixinə böyük bir imza atması ilə fərqlənib: "Çünki bu il çox fantastik yarış oldu. "Mercedes" və "Ferrari", Luis Həmilton və Sebastian Fettel arasında fantastik mübarizə baş tutdu. Əvvəlki illərə nisbətən bu il yarışma daha gərgin və intensiv keçdi və qaliblər 2017-ci ilə nisbətən daha çox xal topladılar. Maks Ferstappenli "RedBull" da çox layiqli mübarizə apardı. Mübarizədə üç komandanın olması olduqca çox maraqlı idi.

Formula 1-də qalib bəllidir - YENİLƏNİB - FOTO

Ona görə də məncə bu il Formula 1 çempionatının tarixində inanılmaz dərəcədə böyük mövsüm oldu. Halbuki, "Mercedes"in 2014, 2015 və 2016-cı illərdə ciddi rəqibi yox idi. Lakin artıq "Ferrari" bunu edə bilir. Bu baxımdan bu il ötən ilkinə nisbətən daha yaxşı mövsüm keçdi".

Formula 1 bilicisi hesab edir ki, növbəti illərdə mübarizə daha gərgin keçə bilər: "Məncə bu il kimin yarışın qalibi olacağını əvvəlcədən proqnozlaşdırmaq olmazdı. Hesab edirəm ki, son yarışdan əvvəl də qalib bəlli olmamalıydı. Düşünürəm ki, "Ferrari"nin işi yaxşı getsəydi, sona qədər mübarizə apara bilərdi. Mən gözləyirəm ki, növbəti il "Ferrari" builki səhvlərindən nəticə çıxaracaq. Məncə həm "Ferrari" komanda şəklində, həm də Sebastiyan Fettel öz səhvlərinə nəzər yetirməli və onları aradan qaldırmalıdır".

Bakıda Formula 1 tamaşaçılarını gözləyən sürprizlərin bəzi detalları açıqlandı

Xatırladaq ki, 2018-ci ildə Formula 1 yarışları üzrə Dünya çempionatının qalıbi 408 xalla "Mercedes"in britaniyalı pilotu Luis Həmilton olub. İkinci yeri 320 xalla "Ferrari"nin alman pilotu Sebastyan Fettel tutub. "Ferrari"nin finlandiyalı pilotu Kimi Raykonen isə 251 xalla üçüncü olub.

Qeyd edək ki, 2018-ci ildə Bakıda baş tutmuş Formula 1 yarışı İngiltərənin məşhur "The Times" və "The Guardian" nəşrləri kimi dünyanın aparıcı kütləvi informasiya vasitələri tərəfindən "2018-ci ilin ən yaxşı yarışı" seçilib.

İlkin İzzət
Milli.Az