Bakıda Formula 1 tamaşaçılarını gözləyən sürprizlərin bəzi detalları açıqlandı

"Azərbaycan Qran prisi artıq bir brendə çevrilib və Formula 1-in tarixinə imza ata bilib".  

"Bakıda 2019-cu il aprelin sonunda baş tutacaq Formula 1 üzrə Azərbaycan Qran prisinə biletlərə endirim kampaniyası davam edir. Biletlər həm xarici, həm də Azərbaycan vətəndaşları üçün 20 faiz endirimlə satılır".

Bu barədə Milli.Az-a açıqlamasında Bakı Şəhər Halqasının (BŞH) Marketinq və Kommunikasıya şöbəsinin müdiri Nigar Arpadarai bildirib.

Onun sözlərinə görə, bununla yanaşı Azərbaycan vətəndaşları üçün əlavə 25 faizlik endirim də var: "Azərbaycandan bizim sayta girəndə bir qiymət görünür, xaricdən girəndə bir başqa qiymət. Həmişə olduğu kimi çalışırıq ki, Azərbaycan vətəndaşları və Azərbaycan ərazisində yaşayan əcnəbilər yarışları izləmək üçün imkanlardan maksimum faydalana bilsinlər. Bu baxımdan biletlərin məhz indi alınması üçün gözəl fürsətdir. Hətta məhz onlara görə bu il biletlərin onlayn satışına gec başladıq. Çünki onlayn satış zamanı adətən xaricilər tez girib ən yaxşı tribunalarda ən yaxşı yerləri alırlar".

Azərbaycandakı Formula 1 yarışı ilə bağlı maraqlı və heyrətamiz statistika

N.Arpadarai qeyd edib ki, Azərbaycan Qran prisinə maraq ilbəil getdikcə artır: "Maraq çox böyükdür. Məsələn, 2018-ci il Qran prisində xaricilərə ondan əvvəlkinə nisbətən 30 faiz çox bilet satmışıq. Ümumilikdə isə Bakıda Formula 1 üzrə birinci Qran prinin keçirildiyi illə indiki arasında xaricilərə satılan biletlərin sayı 3 dəfə artıb. Bundan əlavə, 2017-ci ildə 65 ölkədən bilet alınmışdısa, 2018-ci ildə bilet alınan ölkələrin sayı 78-ə çatdı. Yəni Azərbaycanda Formula 1 yarışlarını izlmək üçün Bakıya gələn əcnəbilərin coğrafiyası da çox genişdir. Həmişəki kimi, ən çox Rusiya, Böyük Britaniya və Ukraynadan maraq göstərirlər. Bizim yarışa həmçinin Niderland, Almaniya, eləcə də ABŞ, Yaxın Şərq və ərəb ölkələri, xüsusən də BƏƏ-dən çox böyük maraq göstərirlər. Bu il isə bilet satışının əvvəlki illərə nisbətən daha çox, bilet alan ölkələrin coğrafiyasının daha geniş olacağı gözlənilir. Çünki Azərbaycan Qran prisi belə demək mümkünsə, bir brendə çevrilib. Artıq demək olar ki, avtoidman həvəskarlarının hamısı bizim yarışı tanıyır. Azərbaycan Qran prisi cəmi 3 ildir ki keçirilir, amma buna baxmayaraq Formula 1-in tarixinə yaddaqalan imza ata bilib". 

Formula 1 üzrə mövsümün son yarışı nəfəs kəsdi - Pilotlardan biri az qala öləcəkdi - FOTO

BŞH sözçüsü yarışla əlaqədar görüləcək işlər və yeniliklərə də aydınlıq gətirib: "Elə də böyük dəyişikliklərin olması gözlənilmir. Uzunluğu təxminən 6 km olan tras şəhərin mərkəzi küçələrindən keçir və dəyişməz olaraq qalır. Lakin tamaşaçıların yarışa buraxılmasında rahatlıq olsun deyə bəzi dəyişikliklərin olacağı istisna deyil.

Tribinaların sayı, eləcə də biletlərin kateqoriyaları da dəyişməyib. Yəni əvvəllər olduğu kimi yenə də 1 və 4 günlük, eləcə də ayaqüstü və tribunalara, həmçinin, korporativ müştərilər üçün ayrıca nəzərdə tutulmuş məkanlara biletlər var.
Yaxın günlərdə Hökumət Evinin qarşısında Pit binasının tikintisinə başlanılacaq. Daha sonra, yəni gələn il isə yolların kənarında təhlükəsizlik baryerlərinin qoyulması, tribunaların inşası həyata keçiriləcək. Yolların müəyyən hissələrdə bağlanması isə həmişə olduğu kimi, yalnız Qran pri həftəsi ərzində olacaq".

Nigar xanım Formula 1 yarışlarına bilet əldə etmiş şəxslər üçün əyləncə proqramları ilə bağlı gözlənilən sürprizlərin bəzi detallarını da açıqlayıb: "Əyləncə proqramları Azərbaycan Qran prisinin ayrılmaz hissəsidir. Bizdə avtoidman kifayət qədər inkişaf etmədiyi üçün Qran Priyə Formula 1 həvəskarları ilə yanaşı əyləncə axtarışında olanları da cəlb edirik. Çünki bəzən konsertə gələn insanlar yarışı izlədikdən sonra onların Formula 1-ə də həvəsi artır. Elə bu səbəbdəndir ki, 2018-ci il Qran prisi vaxtı havanın küləkli olmasına baxmayaraq tribunalar dolu idi. Ona görə də bu il də çalışacağıq ki, əyləncə proqramımız çox zəngin olsun. Bu məqsədlə bulvar ərazisini yeniləyəcəyik. Orda yeni müəyyən oyun zonaları, ayaqüstü tamaşalar və s. əlavə edəcəyik. Həmçinin, həmişəki kimi konsert proqramları təşkil ediləcək. Bu dəfə də 3 dünya ulduzunun konserti gözlənilir. Lakin həmin şəxslərin adları bəlli deyil. Çünki hələ ki, danışıqlar aparılır. Ümumilikdə çalışırıq ki, insanların gözləntilərini doğruldaq. Baxmayaraq ki, əyləncə proqramı bəlli deyil, həm onlayn olaraq internet üzərindən, həm də ticarət mərkəzlərindəki satış məntəqələrində artıq kifayət qədər bilet satılıb".

Azərbaycandakı Formula 1 könüllüləri digər ölkələrdəkindən fərqlənir

Şöbə müdiri əlavə edib ki, təmsil etdiyi komanda istəyir ki, bu Qran pri Azərbaycana hərtəfəli xeyir gətirsin: "Ölkədə həm iqtisadi, həm turizm baxımından inkişafın olduğunu görürük. Lakin çalışırıq ki, biz də buna öz töhfəmizi verək. Görülən işlərdən əlavə Formula 1 yarışlarına minlərlə könüllü cəlb edilir. Onların sayı hər il təxminən 3 min nəfər olur. Könüllülərin mütləq əksəriyyətini gənclər, tələbələr təşkil edirlər. Onların bilik və bacarıqlarının artırılması üçün çoxsaylı seminarlar, təlim və treninqlər keçirilir. Bizim könüllülərlə apardığımız iş heç bir digər ölkədə aparılmır. Bundan əlavə 1500-ə yaxın marşalımız olur. Bu insanların hər biri ilə iş aparılır. Bu da bir insan kapitalıdır, bizim gənclərimizə yatırılan investisiyamızdır".

Qeyd edək ki, BŞH azarkeşlərə 4 günlük biletlərdə məhdud sayda nəzərdə tutulmuş 20%-lik endirim təklif edir. 1 yanvar 2019-cu il tarixinə qədər qüvvədə olacaq bu təklifdən sonra biletlərin satışı tam qiymət üzərindən davam etdiriləcək. Ona görə də BŞH azarkeşləri təklif qüvvədə olduğu müddətdə endirimdən tezliklə yararlanmağa çağırır.

Sırf yerli sakinlərə əlavə 25 %-lik endirim də tətbiq olunur. Yerli sakinlər kateqoriyasına şəxsiyyət vəsiqəsinə sahib hər bir Azərbaycan vətəndaşı və ölkədə müvəqqəti yaşama icazəsi olan hər bir xarici vətəndaş daxildir.

Dörd günlük biletlər azarkeşlərə trekdə 3 gün ərzində davam edəcək yarışlarla yanaşı həmin günlər ərzində trekdən kənarda baş tutacaq əyləncə tədbirlərinə qatılmaq və həmçinin 25 aprel tarixində, cümə axşamı günü keçiriləcək Pit Yolu yürüşündə iştirak etmək imkanı verir. Ötən üç il ərzində Bakıda keçirilmiş yarışlarda bu bənzərsiz təcrübəni yaşamış azarkeşlər F1 komandalarının qarajlarına səfər edərək mühəndis və mexaniklərin pilotları ən unudulmaz yarışlardan birinə necə hazırladıqlarının şahidi olmaq imkanını əldə ediblər.

Bakıdakı Formula 1 yarışlarına biletlərə endirim - BŞH rəhbərindan çağırış

  BŞH 4 günlük biletlər üçün təklif edilən endirim kampaniyasından əlavə 2 ilə 15 yaş arasında olan uşaqlar üçün də xüsusi endirimlər təqdim edir. Nəzərinizə çatdıraq ki, bu kampaniya yalnız 4 günlük biletlərə aiddir və həmçinin azyaşlılar üçün olan 4 günlük biletlər ancaq böyüklər üçün olan müvafiq biletlərlə birgə satılır. Yarış məkanına daxil olarkən etibarlı şəxsiyyət vəsiqəsinin təqdim edilməsi tələb oluna bilər.

Yarışı ayaqüstü zonalardan izləmək istəyənlər bu zonalara olan bir günlük biletləri əldə edə bilərlər.

İlkin endirim kampaniyası müddətində yerli sakinlər üçün təqdim olunan 4 günlük biletlərin qiyməti tribunadan asılı olaraq 190-660 AZN arasında dəyişir. Azyaşlılar üçün bu qiymət müvafiq olaraq 130-470 AZN təşkil edir.

Ayaqüstü zona üçün olan biletlərin qiymətləri isə 80-160 AZN aralığındadır.

2019 Formula 1 Azərbaycan Qran prisini yerində canlı izləmək üçün indidən bilet almaq və bu məqsədlə Bakıya səfərini öncədən planlaşdırmaq istəyənlər daha ətraflı məlumatı BŞH-nin rəsmi www.bakucitycircuit.com saytından əldə edə bilərlər.  

Xatırladaq ki, 2019-cu il Formula 1 üzrə Dünya çempionatının Azərbaycan Qran prisi mərhələsi 26-28 aprel tarixlərində Bakıda keçiriləcək.

İlkin İzzət
Milli.Az