Metrodakı işlər AAYDA-ya görə gecikir?

"Bakı Metropoliteni"nin  planına əsasən 2025-ci ilin sonunda "Dərnəgül" elektrik deposunda birinci mərhələ üzrə işlər tamamlanmalı və və metroda xətlərin ayrılması işləri başlamalı idi.

Milli.Az xəbər verir ki, "28 May"dan "Yaşıl xətt"ə, yəni "Dərnəgül" istiqamətində qatarların hərəkəti dayandırılmalı və qatarlar yalnız, "Dərnəgül" "Nizami" arasında hərəkət etməli idi. Artıq 2026-cı ilin 4-cü ayı olmasına baxmayaraq işlər qrafikdən ciddi şəkildə geri qalır.

"Bakı Metropoliteni" QSC-nin Tikinti Layihələrinin İdarəolunması departamentinin rəis müavini Məmməd Rzayevin sözlərinə görə, Dərnəgül deposu ərazisindən keçərək "Çinarlı" yaşayış kompleksini Abay Kunanbayev küçəsi ilə birləşdirəcək avtomobil və piyada tunellərində işləri davam etdirilir. 

"Dərnəgül deposunun ikinci mərhələsinin tamamlanması və qismən istismara verilməsi isə məhz bu layihənin yekunlaşmasından asılıdır. Tunellərin inşası başa çatdıqdan sonra depo üzrə ikinci mərhələdə nəzərdə tutulan tikinti-quraşdırma işləri də yekunlaşacaq və obyekt mərhələli şəkildə fəaliyyətə başlayacaq".

Rəis müavini Məmməd Rzayevin açıqlamasından məlum olur ki, Azərbaycan Avtomobil Yolları Dövlət Agentliyi (AAYDA) tərəfindən "Çinarlı" yaşayış kompleksindən Abay Kunanbayev küçəsinə doğru çəkiləcək yol metorunun işlərini gecikdirir.

Azərbaycan Avtomobil Yolları Dövlət Agentliyindən verilən məlumata görə isə, sözügedən ərazidə "Çinarlı Park" yaşayış kompleksini Abay Kunanbayev küçəsi ilə birləşdirən avtomobil və piyada tunellərinin tikintisi işləri görülür. İşlərin 2026-ci ilin sonunadək tamamlanması nəzərdə tutulub. 

Xatırladaq ki, "Dərnəgül" elektrik deposunun birinci mərhələ üzrə  inşası tamamlandıqdan sonra "28 May"dan "Yaşıl xətt"ə, yəni "Dərnəgül" istiqamətində qatarların hərəkəti dayandırılacaq. Qatarlar yalnız, "Dərnəgül" "Nizami" arasında hərəkət edəcək. 

Asif Mehman
Milli.Az