"Antiinhisar" suya görə məcburi göstəriş verdi

Antiinhisar və İstehlak Bazarına Nəzarət Dövlət Agentliyi (AİBNDA) su təchizatı sahəsində aparılan monitorinqlər zamanı Azərbaycan Respublikasının Rəqabət Məcəlləsinin tələblərinin pozulduğunu müəyyən edib.

Milli.Az xəbər verir ki, bu səbəbdən Azərbaycan Dövlət Su Ehtiyatları Agentliyi (ADSEA) ilə birgə həyata keçirilən nəzarət tədbirləri çərçivəsində "Regional Su Meliorasiya Xidməti" PHŞ-yə pozuntuların aradan qaldırılması barədə icrası məcburi göstəriş verilib.

AİBNDA təbii inhisar fəaliyyət sahələrində rəqabət normalarına əməl olunmasına nəzarət edir və bu istiqamətdə həm istehlakçıların, həm də təbii inhisar subyektlərinin maraqlarının balanslaşdırılmasına yönəlik tədbirlər görür.

Biləsuvar sakinlərinin müraciətləri əsasında aparılan araşdırmalar zamanı rayonda su təchizatının daha səmərəli və qanunvericiliyə tam uyğun şəkildə qurulması üçün əlavə mexanizmlərə ehtiyac olduğu aşkarlanıb. Nəticədə "Regional Su Meliorasiya Xidməti"nin xidmətinin Rəqabət Məcəlləsinə tam uyğunlaşdırılması məqsədilə iş qaldırılıb.

Araşdırma zamanı müəssisənin Biləsuvar rayonunda su təchizatı ilə bağlı bəzi inzibati və texniki prosesləri qanunvericiliyin tələblərinə uyğun şəkildə daha sistemli icra etməli olduğu müəyyən edilib. Qanun pozuntularının nəticələrinin aradan qaldırılması zəruri hesab olunub.

AİBNDA tərəfindən verilmiş məcburi göstərişə əsasən, "Regional Su Meliorasiya Xidməti" PHŞ ölkə üzrə, o cümlədən Biləsuvar rayonunda su təchizatını qanunvericiliyə uyğun təşkil etməli, su satışında təsdiq olunmuş tarifləri tətbiq etməli, istehlakçı hüquqlarının qorunmasını təmin etməlidir. Bundan əlavə, göstərilən xidmətlərin keyfiyyətinin normativ tələblərə uyğunlaşdırılması tapşırılıb.

Göstəriş çərçivəsində su təchizatının dayanıqlığının artırılması, abonentlərlə işin daha şəffaf təşkili, tariflərin düzgün tətbiqi və mövcud texniki infrastrukturun tədricən təkmilləşdirilməsi nəzərdə tutulur.

AİBNDA ilə ADSEA əməkdaşlığı davam etdirərək su təchizatı sisteminin daha keyfiyyətli və qanunvericiliyə uyğun şəkildə qurulması istiqamətində tədbirləri sürdürəcək.

Milli.Az