Cəmiyyət

Yenə özbaşınalıq: məmur balaları ilə nə edək?

25 May 2015 17:52

5 Şərh Baxış: 8 326

#HADİSƏ

Bakıda məmur balalarının özbaşınalıqları barədə ara-sıra mətbuatda məlumatlar yayılır. Belə hadisələrdən biri də ötən gecə baş verib. Bakıda bir idmançı oğlan öz gücünü qızların üzərində sınayıb. Böyük qəhrəmanlıq göstərib və iki qızın ağız-burnunu əzib.

Hadisə ötən gecə Yasamal rayonu ərazisində yerləşən məşhur "Famous" karaoke-klubda baş verib. Döyülən Elvira Əliyeva saat 03 radələrində karaoke-klubda rəfiqəsi Diana Babayeva ilə əylənirmiş. Elvira mahnı oxuyan zaman qaydasız döyüş üzrə çempion olan İsa Əzizov onlara qarşı gözlənilməz addım atıb. Qızları döydükdən sonra maşınına salıb harasa aparmaq istəyib. Ancaq qızlar "igid"in əlindən güclə də olsa, qurtula biliblər.

Əlqərəz, İsa adlı bir oğulun "igidliyi" bu gün mətbuatın baş mövzularından biri idi. Xəbər ilk yayılanda çoxları düşündü ki, yəqin idmançı dəliqanlıdır. Qolunun gücünə güvənib özbaşınalıq edir. Ancaq sonradan məlum oldu ki, onun güvəndiyi yer heç də əzələli cüssəsi deyilmiş. Güvəndiyi başqa dağlar varmış.

İsa Əzizov hələ də axtarılır. Onu polis axtardığı bir vaxtda jurnalist həmkarlarımız güvəndiri dağı müəyyənləşdiriblər. Sən demə, İsa Azərbaycanda adı çoxlarına tanış olan məşhur generalın bacısı oğlu imiş. Etik səbəblərdən generalın adı açıqlanmadı.

Mümkündür ki, bacıoğlunun bu özbaşınalığında general günahkar deyil. Ancaq nədənsə bu ölkədə indiyə qədər fəhlə oğlunun belə hoqqa çıxardığını heç görməmişik.

Məmur övladlarının şəhərdə özbaşınalıq etməsi birinci dəfə deyil. Onlar haqda çox yazılıb, çox danışılıb. Belə xəbərlər bir daha göstərir ki, hələ də nəticə yoxdur.

Bu məmur balaları ilə nə edək?

Teymur Hacıyev
Milli.Az

Uyğun link: Bakıda generalın idmançı qohumu məşhur klubda qızlara divan tutdu - FOTO