Bakıda tələbə bıçağını həsrətində olduğu köynəyin sahibinə sancdı - TƏFƏRRÜAT

İnsan geyimi ilə qarşılanıb ağlı ilə yola salınır. Amma Bakıda 22 yaşlı gənc gözəl geyiminə görə əbədi dünyaya yola salınıb.

Dəhşətlisi odur ki, bu hadisənin "qəhrəmanı" əsas işi elmə yiyələnmək olan tələbədir. O, daxilini zəngin etmək əvəzinə, zahiri görkəminə üstünlük verib, axırı faciə ilə bitib. Milli.Az xəbər verir ki, Azərbaycan Dövlət Neft Akademiyasının 3-cü kurs tələbəsi, 21 yaşlı Nadir Ələkbərzadənin başqasının geyimi ilə özünü yaraşıqlı göstərmək istəyi dostunun ölümü hesabına başa gəlib. O, geyim üstündə dostunu qətlə yetirib və hadisə yerindən qaçıb. 

Rayon Prokurorluğundan Milli.Az-a bildirildi ki, N.Ələkbərzadəni bir az əvvəl polis tutaraq istintaqa təhvil verib. Onun dindirilməsindən sonra belə ağır cinayət törətməsinin səbəbini öyrənmək mümkün olacaq. Faktla bağlı Cinayət Məcəlləsinin qəsdən adam öldürmə (120.1-ci) maddəsi ilə cinayət işi başlanıb.

Mill.Az isə hadisənin necə və hansı səbəbdən baş verməsini öyrənib. Nadirin 22 yaşlı dostu Elçin Abbasovun köynəyinə gözü düşüb. Həmin köynəyi bir neçə dəfə geyinmək üçün dostundan istəyib. Lakin Elçin köynəyini ona verməkdən imtina edib. Elə bunun üstündə onlar arasında mübahisə düşüb. Söhbəti məktəbin həyətində davam etdirmək üçün görüş təyin ediblər. Lakin Nadir "problem"ini sözlə yox, bıçaqla həll edib. Cibindəki bıçaqla Elçini vurub və qaçıb. Bir zərbə gəncin həyatını yarıda kəsib.

Mərhum Elçin Abbasov tibb avadanlıqlarının satışı ilə məşğul olurmuş.

Anar Məmmədov
Milli.Az