Bakıdakı məktəbdə müəllim biabırçılığı - YENİLƏNİB - FOTO

12:34

Bakıda təqaüdçü qadın müəllimi döyən orta məktəb müəlliminin direktoru baş vermiş hadisəyə aydınlıq gətirdi.

Direktor Əli Əliyev Milli.Az-a açıqlamasında bildirdi ki, baş vermiş hadisə sırf ailədaxili problemdir. Onun sözlərinə görə, döyülən qadın Yaşar Quliyevin böyük qardaşının qaynanasıdır:

"Hadisə məktəbdə olmayıb. Dörd il əvvəl boşanıblar və ondan sonra torpaq mübahisələri yaranıb. Sonra döyülən qadının bir qızı ölüb və elə o vaxtdan da məsələ böyüyüb. Hadisə də avqust ayında olub, niyə bu qadın məsələni indi şişirdib, bu maraqlıdır. İş məhkəmədə və son sözü də qanun deyəcək".

Ə.Əliyev hazırda işi məhkəmədə olan tarix müəllimi Y.Quliyevdən də danışdı: "Yaşar məktəbimizin savadlı müəllimidir. Ali məktəbi fərqlənmə ilə bitirib. Mənimlə yan-yana dayansa, adam döyənə mən oxşayaram, Yaşar yox".

---------
10:01

Bakıda kişi müəllim xanım həmkarını ölümcül döyüb. Suraxanı rayonundakı orta məktəbin müəllimi tərəfindən döyülən 69 yaşlı xanım Müəllimə Yusifova Milli.Az-a müraciət edib:

"45 il müəllim işləmişəm. Məni döyərək, burnumu sındırıb tanınmaz hala salan 33 yaşlı Quliyev Yaşar Ağa oğludur. Quliyev Yaşar Suraxanı rayonu, Əmircan qəsəbəsində yerləşən 154 saylı orta məktəbdə tarix müəllimi işləyir. Xəsarətdən sonra səhhətimdə ciddi xəstəliklər yaranıb. Sizcə, ahıl yaşlı qadına qarşı bu cür cinayət edən Quliyev Yaşar Ağa oğlu müəllim kimi fəaliyyət göstərib, gənc nəslin təlim-tərbiyəsi ilə məşğul ola bilərmi? Məncə, təhsil işçiləri sırasında bu cür şəxsin fəaliyyət göstərməsi onun dərs dediyi uşaqlar üçün də təhlükəlidir".

"Hazırda hadisə ilə bağlı cinayət işinə Suraxanı Rayon Məhkəməsində Gülsarə İmanovanın hakimliyi ilə baxılır. Cinayət Məcəlləsinin 127-ci (qəsdən sağlamlığa az ağır zərər vurma) maddəsi ilə başlanan cinayət işi sonradan dəyişdirilərək 128-ci (qəsdən sağlamlığa yüngül xəsarət vurma) ilə sona çatdırılıb. Xahiş edirəm, məsələ ilə bağlı jurnalist araşdırması aparasınız. Məsələni ictimailəşdirməkdə məqsədim cinayətkarın ədalətli cəza almasıdır", - deyə şikayətçi vurğulayıb.

Anar Məmmədov
Milli.Az

Böyütmək üçün şəkillərə klikləyin.