Turistlər koronavirus məhdudiyyətlərinə qarşı çıxırlar

Turistlər üçün sərhədlərin bağlanması koronavirusun yayılmasının qarşısını almaqda təsirli olmadı və tez bir zamanda yenidən açılmalıdır. Bu fikir bütün dünyada turistlərin əksəriyyəti tərəfindən paylaşılır.

Milli.Az aviatravel.az-a istinadən bildirir ki, bunu Beynəlxalq Hava Nəqliyyatı Assosiasiyasının (IATA) keçirdiyi sorğu göstərib.

"Turistlər, mövcud vəziyyətdən getdikcə daha çox məyus olurlar", - deyən araşdırmanın müəllifləri 11 fərqli bazardan 4700 respondent arasında sorğu keçiriblər. Əksəriyyəti COVID-19 pandemiyası risklərinin lazımi şəkildə idarə oluna biləcəyini qeyd edərək, hərəkət azadlığının ən qısa zamanda bərpa edilməli olduğunu bilbirib.

Respondentlərin 67%-i sərhədlərin çoxunun indi açılmalı olduğunu düşünür, digər 64%-i isə ümumiyyətlə sərhədləri bağlamağa ehtiyac olmadığını söyləyib. Üstəlik, 73%-i səyahət məhdudiyyətlərinin həyat keyfiyyətlərini "əhəmiyyətli dərəcədə pisləşdirdiyini" qeyd edib.

"İnsanlar COVID-19 səbəbiylə səyahət məhdudiyyətlərindən getdikcə daha çox narazıdırlar və bunun nəticəsi olaraq həyat keyfiyyətləri düşür. Virusla mübarizə üçün səyahət məhdudiyyətlərinə ehtiyac görmürlər" - IATA CEO'su Uillie Uolsh sorğunun nəticələrini şərh etdi.

Eyni zamanda, karantin tələbləri hava səyahətlərində əsas maneə olaraq qalır. Beləliklə, 84%-i təyinat ölkəsində özünü təcrid etmə tədbirləri görülərsə getməyəcəklərini söyləyir. Turistlər, xüsusən peyvənd edildikdə, COVID-19 testi mənfi olanlar üçün karantin tələblərinin qaldırılmasını tələb edirlər. Əlavə olaraq, iştirakçıların 80% -i virusa qarşı peyvənd edilənlərin səyahət azadlığının geri qaytarılmasını istəyirlər. Bununla birlikdə, turistlər hava səyahəti üçün məcburi peyvəndlərin əleyhinədirlər: təxminən üçdə ikisi hesab edir ki, ancaq peyvənd olunanların səyahətlərə buraxılması düzgün deyil.

Eyni zamanda, 80%-i yalnız peyvəndi olmayan insanlar üçün hava səyahətindən əvvəl məcburi testlərin saxlanmasını düzgün hesab edir. Digər 75% test xərclərinin ciddi bir maneə olduğunu vurğulayır və 80% test xərclərinin dövlət tərəfindən ödənilməli olduğunu düşünür.

Milli.Az