Dünya

Nasist əsir düşərgəsinin keçmiş nəzarətçisi ABŞ-dan Almaniyaya deportasiya edilib

22 Fevral 2021 22:30
Baxış: 742

ABŞ Ədliyyə Nazirliyinin nümayəndələri bildiriblər ki, Tennessi ştatının 95 yaşlı sakini, nasist Almaniyasında milli azlıqların təqib olunmasında iştirak etmiş Fridrix Karl Berger Almaniyaya deportasiya olunub.

Milli.Az AZƏRTAC-a istinadən bildirir ki, ABŞ Ədliyyə Nazirliyinin məlumatına görə, əslən Almaniya vətəndaşı olan Fridrix Karl Berger 1945-ci ildə nasist Almaniyasında Noyenqamm şəhərindəki əsir düşərgəsində silahlı nəzarətçi vəzifəsində xidmət edib.

İmmiqrasiya məsələləri üzrə hakim hələ 2020-ci ilin fevralında Bergerin deportasiya edilməsi barədə qərar qəbul etmişdi. Keçən il noyabr ayında apelyasiya məhkəməsi bu qərarı qüvvədə saxlayıb. Məhkəmə müəyyən edib ki, Bergerin nəzarətçi kimi xidmət etdiyi Noyenqamm əsir düşərgəsində saxlanan məhbusların ən çoxsaylı qrupları müxtəlif millətlərə mənsub olan SSRİ, Hollandiya və Polşa vətəndaşları idi. Amerika və Avropa arxivlərində saxlanan sənədlər Bergerin təqsirkar olmasını sübut edir.

Hakimin hökmündə göstərilir ki, Noyenqamm düşərgəsindəki məhbuslar dəhşətli şəraitdə saxlanır, 1945-ci ilin qışında açıq havada "taqətdən düşənə və ölənə qədər" işləməyə məcbur edilirdi. Berger nəzarət edirdi ki, məhbuslar iş günü ərzində qaça bilməsinlər. 1945-ci il martın axırlarında müttəfiqlərin qoşunları fəal hücuma keçməyə başlayanda nasistlər bu düşərgəni tərk ediblər.

Məhkəmə müəyyən edib ki, məhbusların Noyenqammdakı əsas düşərgəyə məcburi şəkildə təxliyə olunması zamanı Berger bu prosesə nəzarət edirmiş. Qeyri-insani şəraitdə təqribən iki həftə davam etmiş təxliyə zamanı 70-ə yaxın məhbus həlak olub.

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.