Rusiya Ermənistanın qazını və işığını kəsdi

Bütün Ermənistan ərazisində əhaliyə elektroenerji və təbii qazın verilməsi dayandırılıb.

Ermənistanın Baş naziri Nikol Paşinyanın qərarı belədir.

O, Rusiyanın "Qazprom" korporasiyasının Ermənistandakı nümayəndəsi olan və Ermənistanın qazpaylaşan şəbəkəsinə tam nəzarət edən "Qazprom Armeniya"ya müraciət edərək sabah ölkədə təbii qaz istehlakını maksimum məhdudlaşdırmağa çağırıb.

Səbəb Ermənistandakı qazpaylama şəbəkəsinin faciəli vəziyyətdə olmasıdır. Son üç ildə şəbəkənin təmirinə və yenilənməsinə əsla sərmayə yatırılmayıb. Üstəlik, N.Paşinyanın göstərişi ilə "Qazprom Armeniya"ya qarşı cinayət işləri qaldırılıb, istintaq gedir.

Ermənistanda elektroenerji istehsalı, əsasən, istilik-elektrik stansiyaları vasitəsilə reallaşdığından, ölkədə əhaliyə elektroenerjinin verilməsi də dayandırılıb.

"Blekaut" bir gün davam edəcək.

"Qazprom Armeniya" isə vəziyyəti nisbətən "qanuniləşdirməyə" çalışıb.

Şirkətin yaydığı açıqlamada deyilir: "Ermənistanı təbii qazla təmin edən Karmir Kamuc-Sevkar-Berd istiqamətindəki 1020 mm diametrli magistral qaz boru kəmərində qəza-bərpa işləri aparıldığından Gürcüstan ərazisindən Ermənistana təbii qazın verilməsinin yanvarın 14-ü səhər saat 7-dən etibarən yanvarın 15-i səhər saat 7-yədək dayandırılmasına zərurət yaranıb.

Ermənistandakı yeraltı təbii qaz anbarları stansiyalarından sutkada maksimum 6 milyon kubmetr qaz verilə biləcəyini nəzərə alaraq qəzanın və ya başqa arzuolunmaz hadisənin qarşısını almaq üçün ölkə ərazisindəki avtomobil qazdoldurma kompressor stansiyalarının və İrəvan istilik-elektrik stansiyasaının fəaliyyətinin dayandırılması məqbul bilinib".

Səhər saatlarından etibarən Ermənistanın bütün ərazisində təbii qazın və elektroenerjinin verilməsi dayandırılıb.

Xatırladaq ki, Rusiyanın "Qazprom" korporasiyası Ermənistana təbii qazın hər 1000 kubmetrini 165 dollardan satır.

Orxan Hun
Milli.Az