Süni intellektlə hazırlanan dərman qocalmanı ləngitdi

Süni intellektdən istifadə edilməklə hazırlanan eksperimental rentosertib preparatı qocalma ilə əlaqəli bəzi bioloji göstəricilərə təsir etmək qabiliyyəti nümayiş etdirib.

Milli.Az xəbər verir ki, araşdırmanın nəticələri "Nature Biotechnology" jurnalında dərc olunub.

Bununla belə, əldə edilən nəticələr preparatın insanlarda qocalma prosesini həqiqətən ləngitdiyini və ya ömrü uzatdığını söyləməyə hələ imkan vermir.

Dərmanı "Insilico Medicine" şirkəti hazırlayıb. Şirkət əvvəlcə preparatı xroniki ağciyər xəstəliklərinin müalicəsi üçün nəzərdə tutub.

Yeni araşdırma çərçivəsində mütəxəssislər dərmanın orqanizmin bioloji yaşının qiymətləndirilməsində istifadə olunan biomarkerlərə təsirini yoxlayıblar.

Tədqiqatda 42 könüllü iştirak edib. Alimlər 12 həftə ərzində onların orqanizmində baş verən dəyişiklikləri bioloji yaşı qiymətləndirən altı müxtəlif model vasitəsilə izləyiblər.

Tərtibatçıların açıqladığı nəticələrə əsasən, rentosertib qəbul edən iştirakçılarda tədqiqat müddətində bioloji yaşla əlaqəli bəzi göstəricilərin səviyyəsi azalıb. Plasebo qəbul edən və ümumiyyətlə müalicə almayan qruplarda isə həmin göstəricilər ya demək olar dəyişməyib, ya da artıb.

Tədqiqatçılar preparatın qocalma ilə əlaqəli bir neçə mexanizmə eyni anda təsir göstərə biləcəyini ehtimal edirlər. Lakin müşahidə olunan dəyişikliklər hələlik yalnız müəyyən biomarkerlərin dinamikasını göstərir və orqanizmin faktiki olaraq cavanlaşdığını sübut etmir.

"Bioloji saatlar" adlandırılan üsullar insanın bioloji yaşını müəyyənləşdirmək üçün DNT-nin vəziyyəti, qanın tərkibi və digər fizioloji göstəriciləri təhlil edən müxtəlif modellərdir.

Bu üsullardan qocalma prosesinin öyrənilməsinə həsr olunan elmi araşdırmalarda geniş istifadə edilsə də, onların dəqiqliyi və imkanları mütəxəssislər arasında hələ də müzakirə mövzusudur. Hazırda insanın bioloji yaşını etibarlı şəkildə müəyyən edə bilən vahid metod mövcud deyil.

Buna görə də bioloji yaş göstəricilərinin yaxşılaşması preparatın qocalmanı ləngitdiyini və ya yaşla əlaqəli xəstəliklərin yaranma riskini azaltdığını hələ sübut etmir.

Rentosertib hazırda eksperimental hazırlıq mərhələsindədir. Onun effektivliyi və təhlükəsizliyinin müəyyən edilməsi üçün əlavə klinik sınaqların keçirilməsi tələb olunur.

Yalnız daha geniş və etibarlı nəticələr əldə edildikdən sonra preparatın qocalma proseslərinə həqiqətən təsir edib-etmədiyini və gələcəkdə tənzimləyici qurumlar tərəfindən təsdiqlənməsi üçün əsasların olub-olmadığını müəyyənləşdirmək mümkün olacaq. (lent.az)

Müəllif: Ülkər Vəliyeva (Milli.Az redaktor)