ABŞ ona viza vermədi

Fələstin Futbol Federasiyasının prezidenti Cibril Rəcub 2026-cı il Dünya Çempionatı çərçivəsində ABŞ-yə səfər edə bilməyəcəyini açıqlayıb.

Milli.Az-ın məlumatına görə, o bildirib ki, FIFA-nın dəvətinə baxmayaraq, ABŞ ona viza verməyib.

Dünya çempionatının ev sahiblərindən biri olan Meksikada keçirilən açılış matçında iştirak edən Rəcub turnirin ABŞ-də baş tutacaq mərhələlərinə qatıla bilməyəcəyini deyib.

ABŞ-nin viza siyasətinin FIFA-nın ənənəvi olaraq bütün milli federasiyaların rəhbərlərini bir araya gətirdiyi tədbirdə problemlər yaratdığı bildirilir.

Rəcub futbolun universal hüquq olduğunu vurğulayaraq, müxtəlif ölkələrdən olan idman rəsmilərinin bu hüquqdan məhrum edilməsinin ədalətsiz olduğunu qeyd edib.

Məlumata görə, viza problemi yalnız Fələstin nümayəndə heyəti ilə məhdudlaşmayıb. ABŞ-nin müxtəlif ölkələrdən olan bir sıra nümayəndələrin, o cümlədən, FIFA tərəfindən akkreditə olunmuş somalili hakimin və İraq millisinin heyətində yer alan fotoqrafın ölkəyə girişinə icazə vermədiyi bildirilir.

FIFA prezidenti Canni İnfantino ötən il bütün iştirakçıların turnirdə problemsiz iştirak edə biləcəyini bildirsə də, bu həftə keçirdiyi mətbuat konfransında hökumətlərin və təhlükəsizlik qurumlarının qərarlarına müdaxilə edə bilməyəcəklərini etiraf edib. ABŞ Dövlət Departamenti isə məsələ ilə bağlı hələlik açıqlama verməyib.

Qeyd olunur ki, bu addım Vaşinqtonun son dövrlərdə Fələstin pasportu daşıyan şəxslərə və Fələstin Muxtariyyətində fəaliyyət göstərmiş rəsmilərə tətbiq etdiyi məhdudiyyətlərin davamı kimi qiymətləndirilir.

Fələstin Futbol Federasiyası ilə FIFA arasında İsraillə bağlı fikir ayrılıqları da qalmaqdadır. Fələstin tərəfi İsrailin işğal altındakı Qərb Sahilində yerləşən yaşayış məntəqələrinin komandalarının milli liqalarda iştirakına icazə verilməsinin FIFA qaydalarına zidd olduğunu deyir.

Rəcub Qəzzada idman infrastrukturunun böyük hissəsinin dağıdıldığını və münaqişə zamanı yüzlərlə idmançının həlak olduğunu bildirib. O, həmçinin qeyd edib ki, Rusiyanın ev sahibliyi etdiyi 2018-ci il dünya çempionatında qonaqlara qarşı bu cür siyasi viza məhdudiyyətləri tətbiq olunmayıb./"Qafqazinfo"