Dünya

Dünyanın ən zəngin qızıl yatağı tapıldı: Dəyəri 83 milyard dollardır

24 Mart 2026 23:37

Baxış: 1 685

VTB-də minimal faiz dərəcəsi ilə nağd kredit 9.9%-dən

#DÜNYADA #QIZIL

Çində Pinçzyan qraflığının təpələri altında, yerin iki kilometr dərinliyində 40 ayrı qızıl damarı aşkar olunub. Qazma nümunələrini araşdıran geoloq Çen Rulin nümunələrin çoxunda gözlə görünən qızıl varlığının təsdiqləndiyini açıqlayıb. Aparılan proqnozlar göstərir ki, üç kilometr dərinliyə enildikdə yatağın ümumi dəyəri 600 milyard yuana (təxminən 83 milyard ABŞ dolları) çata bilər.

Milli.Az xəbər verir ki, Vanqu yatağını digər mədənlərdən fərqləndirən əsas xüsusiyyət filizdəki qızıl konsentrasiyasının yüksəkliyidir. Kommersiya məqsədli mədənlərin çoxu bir ton filizdə 10 qramdan az qızıl nisbəti ilə fəaliyyət göstərdiyi halda, Vanqudan alınan bəzi nümunələrdə bir tonda 138 qram qızıl təsbit edilib. Bu sıxlıq səviyyəsi yatağın təkcə ölçü baxımından deyil, səmərəlilik baxımından da qlobal ortalamadan on qat daha yüksək olduğunu sübut edir.

Ekspertlər bildirirlər ki, 1000 tonluq yekun təxmin təsdiqlənərsə, bu mədən Cənubi Afrikadakı məşhur "South Deep" mədənini geridə qoyaraq dünyanın ən böyük fəaliyyətdə olan qızıl sahəsi olacaq.

Əsas sahənin ətrafındakı strateji nöqtələrdə aparılan əlavə qazma işləri qızıl damarlarının mövcud xəritələrin sərhədlərini aşdığını üzə çıxarıb. Bu tapıntılar yatağın təxmin ediləndən daha geniş coğrafi əraziyə yayıldığına dair güclü sübutlar təqdim edir. Hazırda kəşfiyyat və araşdırma mərhələsində olan layihənin tam həcminin dəqiqləşdirilməsi üçün dərin qazma işləri davam etdirilir. 1000 tonluq ehtiyat potensialının qətiləşməsi davam edən test nəticələrindən və üç kilometr dərinlikdəki damarların kəsilmədən davam etməsindən asılı olacaq.

Lalə Qüdrətova
Milli.Az