Şara: Ölkənin şimal-şərqində atəşkəs elan edildi - FOTO

Suriya ordusu ilə YPG/SDG qruplaşması arasında günlərlə davam edən şiddətli qarşıdurmalardan sonra Suriya Prezidenti Şaradan kritik açıqlama gəlib. Şara atəşkəs əldə olunduğunu və dövlət qurumlarının yenidən həmin bölgələrə qayıdacağını bəyan edib.

Milli.Az xəbər verir ki, Suriya ordusu son günlərdə Hələbdəki bəzi məhəllələri (Şeyx Maqsud və Əşrəfiyyə) nəzarətə götürdükdən sonra Fəratın qərbində irəliləyərək Rakka, Təbqa və Deyrizoru ələ keçirmişdi. Bu hərbi uğurların ardınca Şam rəhbərliyi ilə SDG arasında "tam inteqrasiya" (birləşmə) nəzərdə tutan saziş imzalanıb.

Sazişin 14 maddəlik əsas şərtləri:
Dərhal atəşkəs: Bütün cəbhələrdə döyüşlər dayanır; SDG qüvvələri Fərat çayının şərqinə çəkilir.

Dövlət nəzarəti: Deyrizor və Rakka vilayətləri hərbi və inzibati cəhətdən tamamilə Suriya hökumətinə təhvil verilir.

Həsəkənin inteqrasiyası: Həsəkədəki mülki qurumlar dövlət idarəçiliyinə birləşdirilir.

Sərhəd və Neft: Bütün sərhəd keçid məntəqələri, neft və qaz yataqları Suriya ordusunun nəzarətinə keçir.

Hərbi birləşmə: SDG personalı yoxlamadan keçdikdən sonra fərdi şəkildə Suriya Müdafiə və Daxili İşlər Nazirliklərinə qəbul edilir.

Köhnə kadrların təhvili: SDG öz sıralarındakı keçmiş rejim zabitlərinin siyahısını hökumətə təqdim etməlidir.

Yeni təyinat: Həsəkəyə yeni vali təyin edilməsi üçün qərar veriləcək.

Kobani (Ayn əl-Ərəb): Şəhərdəki ağır hərbi texnika çıxarılır, yerli polis gücü yaradılır.

İŞİD dustaqları: İŞİD üzvlərinin saxlanıldığı düşərgələr və həbsxanalar Suriya dövlətinə təhvil verilir.

Mərkəzi vəzifələr: SDG liderlərinin təqdim etdiyi bəzi namizədlər dövlətin yüksək vəzifələrinə təyin olunacaq.

Kürdlərin hüquqları: Kürdlərin mədəni və dil hüquqları tanınır, sənədsiz (vətəndaşlığı olmayan) şəxslərin problemləri həll edilir.

PKK-nın çıxarılması: SDG Suriya vətəndaşı olmayan bütün PKK üzvlərini ölkədən çıxarmağı öhdəsinə götürür.

İŞİD-lə mübarizə: Suriya dövləti ABŞ və Beynəlxalq Koalisiya ilə koordinasiyalı şəkildə İŞİD-lə mübarizəni davam etdirəcək.

Afrinə qayıdış: Afrin və Şeyx Maqsud sakinlərinin evlərinə ləyaqətli qayıdışı üçün işlər aparılacaq.

Lalə Qüdrətova
Milli.Az