Oğlu Maduro haqqında danışdı - YENİLƏNİB - VİDEO

14:48

Venesuelanın ələ keçirilmiş və ölkədən çıxarılmış Prezidenti Nikolas Maduronun oğlu, parlament üzvü Nikolas Maduro Qerra, atasından danışıb.

Milli.Az xarici mətbuata istinadən xəbər verir ki, onun parlamentdəki çıxışı emosional anlarla yadda qalıb.

O, atasına qarşı baş verən hadisələrdən söz açarkən bildirib ki, dövlət başçısının qaçırılması, xarici güclərin təzyiqinə boyun əyməyən bütün ölkələr üçün ciddi təhlükə yaradır.

Nikolas Maduro Qerra deyib:

"Əgər dövlət başçısının qaçırılması adi hala çevrilərsə, heç bir ölkə öz təhlükəsizliyini təmin edə bilməyəcək. Bu gün bu, Venesueladadır, sabah isə istənilən tabe olmayan ölkə hədəfə çevrilə bilər."

Sonra o, atasına müraciət edərək vurğulayıb:

"Sən ailəmizdə hər birimizi güclü və mərd insanlara çevirmisən. Biz buradayıq və sən qayıdana qədər üzərimizə düşən vəzifəni yerinə yetirəcəyik. Ölkə təhlükəsiz əllərdədir, ata. Tezliklə Venesuelada sənlə qucaqlaşacağıq. Sən oğlanlarını və Siliya xanımı görəcəksən."

Oğul həmçinin ölkənin müvəqqəti prezidenti Delsi Rodrigezə öz və ailəsi adından dəstək ifadə edib.

Xatırladaq ki, yanvarın 3-ü ABŞ hərbi qüvvələri Venesuelanın paytaxtı Karakas və ətraf ştatlarda strateji obyektlərə genişmiqyaslı zərbələr endirmişdi. Əməliyyat nəticəsində Prezident Nikolas Maduro və xanımı Siliya Flores ələ keçirilərək Nyu-Yorka aparılıb.

00:52

ABŞ-nin xüsusi təyinatlıları tərəfindən ələ keçirilən Venesuela lideri Nikolas Maduro gec-tez vətəninə qayıdacaq.

Milli.Az oxu.az-a istinadən xəbər verir ki, bu barədə Maduronun oğlu, Venesuela parlamentinin üzvü Nikolas Maduro Qerra bildirib.

O, parlamentin iclasında deyib ki, bu, xalqın həm Venesuela daxilində, həm də onun hüdudlarından kənarda birləşməsi sayəsində mümkün olacaq.

Maduronun oğlu Venesuela Ali Məhkəməsinin qərarına əsasən, dövlət başçısının səlahiyyətlərini icra edəcək vitse-prezident Delsi Rodrigesə tam dəstəyini ifadə edib.

Milli.Az