Dünya

Misirdə Firona aid 3 min illik qızıl bilərzik oğurlanaraq əridildi

19 Sentyabr 2025 07:07

Baxış: 1 162

VTB-də minimal faiz dərəcəsi ilə nağd kredit 9.9%-dən

#MİSİR

Misirin paytaxtı Qahirədəki muzeydən Firon Amenemope-yə aid 3 min illik qızıl bilərziyin oğurlandığı üzə çıxıb. Tarixi əhəmiyyətinə görə dəyəri ölçülməz olan bilərzik bir neçə dəfə satıldıqdan sonra son sahibi tərəfindən əridilərək başqa bir zinət əşyasına çevrilib.

Misir Daxili İşlər Nazirliyinin məlumatına görə, 13 sentyabrda Misir Muzeyinin restavrasiya emalatxanasında saxlanılan dəmir seyfdəki qədim bilərziyin yoxa çıxdığı müəyyən edilib. Araşdırmalar nəticəsində oğurluğu muzeydə çalışan bir texnikin etdiyi məlum olub.

Həmin şəxs 9 sentyabrda bilərziyi oğurlayaraq Qahirədəki bir gümüş taciri ilə əlaqə saxlayıb.

Tacir bilərziyi 180 min cüneyhə (təxminən 3 750 dollar) bir qızıl emalatxanasının sahibinə satıb. Daha sonra emalatxana sahibi isə onu 194 min cüneyhə (təxminən 4 000 dollar) dəyərində qızıl tökmə işçisi olan birinə ötürüb.

Son alıcı bilərziyi digər qızıllarla birlikdə əridərək yeni bir məmulat hazırlayıb. Şübhəlilər artıq saxlanılıb və cinayəti etiraf ediblər. Bilərziyin satışından əldə olunan vəsaitə də əl qoyulub.

Qeyd edək ki, bilərzik Antik Misirin Üçüncü Ara Dövrünə (e.ə. 1075-652-ci illər) aiddir. Beynəlxalq mətbuatda bu əsərin tayı-bərabəri olmayan dəyərə malik olduğu vurğulanır.

Lalə Qüdrətova
Milli.Az